Merkezê Îrtîbatî û Çapemenîye yê HPGyî bi eşkerayîyêke da zanayene ke hîrê gerîlayî Metîna de şehîd bîyê. Eşkerayîye wina ya:

''30ê êlula 2022yî de hêrişê dişmenî de Warê Xoverdayîşî yê Girê Hekarî yê Metîna de embazanê ma Qehreman Murat, Rûbar Xemgîn û Fîraz Artêşî heta nefesê xo yê peyênî bi fedayîtî xo ver da û ê şehîd bîyî.

Embazê ma Qehreman, Rûbar û Fîrazî bîyî pawitoxê cuya PKKyî ya fîraze ke na cuye bi embazîyêka xurte û ked û gonîya bi hezaran şehîdan ameya afernayene. Ma soz danê ke heta peynî têkoşînê embazanê xo xo rê bikerê nimûne û vîrameyîşê înan bipawê. Bi nê hîsan ma sere de keyeyanê şehîdanê xo rê pêro şarê Kurdîstanî yê welatperwerî rê serweşîye wazenê.

Nasnameyê embazanê ma yê şehîdan wina yê:

Nameyê Qodî: Qehreman Murat Name û Peyname: Orhan Demir Cayê Bîyayîşî: Riha Maye-Pî: Xanime – Haci Bekîr Tarîx û Cayê Şehadetî: 30ê Êlula 2022yî / Metîna

 

Nameyê Qodî: Rûbar Xemgîn Name û Peyname: Mihemed Direwş Cayê Bîyayîşî: Maku Maye-Pî: Ayşe – Enwer Tarîx û Cayê Şehadetî: 30ê Êlula 2022yî / Metîna

 

Nameyê Qodî: Fîraz Artêş Name û Peyname: Muhammed Heliç Cayê Bîyayîşî: Kobanê Maye-Pî: Xezale – Minih Tarîx û Cayê Şehadetî: 30ê Êlula 2022yî / Metîna

Embazê ma Qehreman qezaya Curnê Reşî ya Riha de dadîya xo ra beno. O 2005 de partîya ma PKK şinasneno û 2011 de cigêrayîşanê xo ra pey verê xo dano koyanê azadan. Embaz Qehreman Qendîl de perwerde vînneo û xeylêk waranê Qendîlî de têkoşîn keno. Wextê hêrişanê DAÎŞî de o Mûsil û Kerkûk de şer keno û dima derbazê Herêmanê Pawitişî yê Medya beno. Embaz Qehreman Warê Xoverdayîşî yê Girê Hekarî de bi xurtî cewab dano hêrişanê dişmenî, çalakîyanê serkewteyan de cagêno û embazanê xo rê beno çimeyê moral û motîvasyonî. 

 

Embazê ma Rûbar şaristanê Makuyî yê Rojhelatê Kurdîstanî de dadîya xo ra beno. Embaz Rûbar şehadetê merdima xo Dîyana Dêrsim ra dima wazeno tewrê têkoşînî bibo û naye ser o 2015 de tewrê gerîlayan beno. O Serhed de perwerde vîneno, dima derbazê Herêmanê Pawitişî yê Medya beno. Embaz Rûbar Avaşîn û Zap de têkoşînêkê xurtî keno û beno wayîrê pratîkêkê serkewteyî. Embaz Rûbar Metîna de sey sûîkastwanî tewrê şerî beno û her cayê Metîna de şer keno. Embaz Rûbar hêrsê xo yê vera dişmenî meydananê şerî de eşkera keno û derbanê zixman dano dişmenî ro.

 

Embazê ma Fîraz Kobanê de dadîya xo ra beno. O bi Şorişê Rojawanî partîya ma şinasneno û beno şahîdê xoverdayîşê Kobanê. Embaz Fîraz 2017 de tewrê xoverdayîşê Rojawanî beno û dima verê xo dano koyan. O cade adapteyê cuya gerîlayan beno û xo hîna aver beno.Embazê ma Fîraz çalakîyanê serkewteyan de cagêno û embazanê xo rê beno çimeyê hêz û moralî. Embaz Fîraz rixmê şertanê xoran zî tim bi hişmendîya Apogîran têgêreno. Embaz Fîraz tim gêreno ke derban bido dişmenî ro û nê xîretî ser o şehîd beno. Ma soz danê ke xeyalê ci yê Kurdîstanê Azadî bîyarê ca.''