KCKyî da zanayene ke weçînayîşan mesuldarîyê hêzanê demokrasîyî zêdînayê û ganî netîceyê têkoşînê vera faşîzmî bivurîyê çalakî û rêxistinkerdişî, bingeyê azadîya kurdan de xebatê demokratîkkerdişê Tirkîya bêrê kerdene.
Hemserekîya Konseya Rayberdişî ya KCKyî bi eşkerayîyêke venga hêzanê demokrasîyî da ke seba çareserîya meseleya kurdan têbigêrê.
Eşkerayîye wina ya:
''Weçînayîşanê herêmîyan ê 31ê adare de netîceyî qetî bîyî. Seba tewirê şarê kurdî û hêzanê demokratîk û şorişgêran ê Tirkîya ma nê prosesî girîng vînenê. Nê weçînayîşan zemînê çareserîya meseleyan zixm kerd û firsendî dayî hêzanê sîyasîyan. Ma zî sey têgêrayîşê azadîye yê kurdan na rewşe sey yew firsendî vînenê û nê esasî ser o nêzdîbîyayîşê xo dîyar bikerê. Coka ma pawitiş û fikranê xo deklare kenê.
Heyf ke weçînayîşî rewşêka antî-demokratîje de qewimîyayî. Îqtîdarî bi taybetî Vakurê Kurdîstanî de bi destê dewlete dek û dolabî kerdî û xîret kerd ke îradeyê şarî xesp bikero. Seke Wan de ame dîyene xoverdayîşê şarî û destekê rayaumûmîya Tirkîya ya demokratîke verê xespî girewt. Rixmê pêro kerdişanê xo zî îqtîdarê AKP-MHPyî weçînayîşan de bin kewt û seke bîyo merdeyêko sîyasî.
Bêguman netîceya weçînayîşan a tewr girînge na ya ke îqtîdaro ke her xirabîye nê 22 serran de kerda, bin kewto. Seba demokratîkbîyayîşê Tirkîya, çareserîya meseleyan, vurîyayîşê komelî, caardişê waştişê azadî û demokrasîyî no çi qewimîyayîşêko girîng o. AKPyî bi weadê çareserîya meseleya kurdan destek dîbî û îqtîdar vistbi destî. La îqtîdaranê verênan ra zêdeyêr dişmenîya kurdan kerde û Tirkîya berde verê rijîyayîşî. Îqtîdarî bi dişmenîya vera kurdan welat îdare kerd û netîceya na dişmenîye de îqtîdar kewt nê halî. Dişmenîya vera kurdan yena manaya dişmenîya vera erjanê merdimatîye, azadîye û demokrasîyî. Weçînayîşanê 31ê adare peynîya na rewşe arde û AKP kerd partîya diyîne.
A raşte îqtîdarê AKPyî weçînayîşanê 7ê hezîrana 2015î de zî verê sîyasetê kurdan de bin kewtbi. La dima AKPyî partîya nîjadpereste MHP de îtîfaq kerd û a roje ra nata welat bi mekanîzmaya darbe îdare kerd. La weçînayîşanê 31ê adare de na mekanîzma ameye vindarnayene.
Binkewtişê faşîzmî de tewirê şarê kurdî û têkoşînê Kurdîstanî bîyî dîyarker. Aktorê netîceyanê 31ê adare şarê kurdî yo ke serkêşîya têgêrayîşê azadîye yê kurdan de têkoşîn keno. Îmrali de Rayber Apoyî, koyan de gerîlayan, zîndanan de embazanê ma, cinî û ciwanan pîya nê prosesî de xo ver da. Nê xoverdayîşî rayîr nêda faşîzmî. Şarê kurdî 31ê adare de zî no tewir bi zelalî eşkera kerd û mojna ke demokratîkkerdişê Tirkîya de isrardar o. Ganî no israr û tewir bêrê famkerdene. Şarê kurdî şaranê Tirkîya û hêzanê demokrasîyî reyde bi stratejîya cuya hempare ser kewt.
Nê serkewtiş û netîceyan dînamîkê têkoşînî û mesuldarîyê hêzanê demokrasîyî zêdînayî. Ganî netîceyê têkoşînê vera faşîzmî bivurîyê çalakî û rêxistinkerdişî, bingeyê azadîya kurdan de xebatê demokratîkkerdişê Tirkîya bêrê kerdene. Verê hêzanê demokratîkan de mesuldarîyê tarîxîyî est ê. Hêzê demokratîkî ganî nê xebatan bikerê, mesuldarîyanê xo bîyarê ca û serkêşîya qewimîyayîşan bikerê. Ganî têkoşînê vera faşîzmî bêro pîlkerdene. Şarê kurdî tewirê xo yê cuya azade û demokratîkbîyayîşî de israrê xo rê wa dewam bikero û hêzê demokrasîyî zî wa wayîrê nê vejîyê.
Weçînayîşanê 31ê adare de CHPyî 50 serran ra dima bi partîya yewine. Nika rapey erkê CHPyî zaf girîng ê. Ganî CHP netîceyanê nê prosesî hol biercno. Eşkera yo şar CHPyî ra paweno ke bi mesuldarî têbigêro. CHP ganî têkoşînê vera faşîzmî de girîngîya kurdan û hêzanê demokratîk û şorişgêran bivîno, pawitişê demorkasîyî yê şarî raşt biercno û bîyaro ca.
Komelê Tirkîya 1973 de zî destek dabi CHPyî û waştbi ke demokrasîyî bîyaro ca. La serkêşîya Bulent Ecevîtî de CHPyî dewletperestîya radîkale, nîjadperestîye û şovenîzm weçînabi. CHPyî o çax seba çareserîya meseleya kurdan îradeyêk nêmojnabi. Nika şarî ancî firsendêk da CHPyî. Eke CHP nê firsendî biercno do destek bigêro. O çax ma zî do destek bidê ci. Ewro welat mîyanê krîzanê pîlan de yo. Eke meseleya kurdan bêra çareserkerdene nê krîzî do biqedê. Seba ney CHP seba çareserîya meseleya kurdan ganî gamanê xo bierzo.
Eke CHP bernameyê xo yê demokratîkbîyayîşî eşkera bikero û gamanê raştan bierzo şar do paştî bido ci. Bêguman seba demokratîkbîyayîşî xebat û gamê bêsînorî lazim ê ke ganî cade bêrê kerdene. Ma do paştî bida her gama raşte.''
