Hemvervatoxanê Komîsyonê Huqûq û Heqanê Merdiman ê DEM Partî Nuraye Ozdogan û Ozturk Turkdoganî derheqê binpaykerdişan û hêrişanê partîya xo de bi kombîyayîşê çapemenîye raporêk eşkera kerd.

Turkdoganî kombîyayîş de pare kerd ke 2015 ra nata operasyonanê vera partîyanê înan (HDP, YSP, DBP, DEM Partî) de tewr tay 22 hezar û 818 kesî ameyê destbendkerdene û nînan ra hemserekî zî tede tewr tay 4 hezar 334 kesî ameyê tepiştene. Turkdoganî vat: ''2015 ra nata hemserekê partîya ma zî tede 24 wekîlê ma û 30 endamê Heyetê Rayberdişê Merkezî (MYK)tepişîyayî. 7 wekîl û 14 endamê ma yê MYKyî hema tepişte yê. 2014î de 93 hemşaredarê ma tepişîyayî, 95 şaredarîyanê ma rê qeyûmî ameyî tayînkerdene. 2016 de 43 hemşaredarê ma tepişîyayî û 48 şaredarîyanê ma rê qeyûmî ameyî tayînkerdene. 44 hemşaredarê ma hema zî tepişte yê.

11 menganê 2023yî de doman û îdarekarê partîya ma zî tede 2906 kesî ameyî destbendkerdene û 319 kesî tepişîyayî.

Mabêê 2015-2023yî de vera partîya ma 336 hêrişî ameyî kerdene. Nê hêrişan de di embazanê ma dinyaya xo bedilnaye û 76 kesî birîndar bîyî. Hêrişanê bi bombayan de 142 kesan dinyaya xo bedilnaye.

Wextê qedexeyanê tebervejîyayîşî yê 2015î de binpaykerdişê pîlî qewimîyayî. 2016 de hemserekê ma Fîgene Yuksekdag û Selahattîn Demîrtaş ameyî esîrgirewtene. 2017 de vera gorê dadîya Aysele Tugluk hêriş ame kerdene. 2021 de vera partîya ma dewaya qefilnayîşî ameye akerdene.''

Hemvervatoxe Nuraye Ozdogan zî vat: ''Çew nêeşkeno verê têkoşîn û xoverdayîşê ma bigêro. Ma do rixmê nê kerdişan zî têkoşînê demokrasîyî rê dewam bikerê.