Zîndanê Bunyanî yê Kayserî de nêweşa çolyakî Merve Aydogan rixmo ke tede semptomê vîrusê Korona estê nêna weşkerdene. Merve  Nazli Solgun û Rojda Tokçu reyde 22ê nîsane ra nata koxûş de binê karantîna de ya. 3 tepişteyan de zî bêhalî, dejê qirikî û kêmasîya vînayîşî estê la seba ke ê revîr de maruzê tedawîyê bi kelemçeyan mendî bêtedawî koxûş de gêrîyayî binê karantîna. 3 tepişteyan Merve Aydogan, Nazli Solgun û Rojda Tokçu rê testê vîrusê Korona hema nêame kerdene.

Merve Aydogan pê rayîrê telefonî waka xo Şukrane Aydogan rê qala rewşa xo kerde. Merve Aydogan derheqê binpaykerdişê heqan de nê çîyî vatî: ''Ez hema zî nêeşkena bivîna. Doxa mi esta û zerrîya mi qelibîyena. Ez nêeşkena çîyêk biwera. Ez robar de gina erd û virita, zaf dejê mi estbi. Embazanê mi venga gardîyane daye la a nêameya. Wexto ke ameyî zî têna ewnîyayî nabzê mi. Seba ke nabzê mi teng bi ez berda nêweşxaneyê zîndanî. Mi uca de vat ke mi hewteyêk virit. Dermanî dayî mi û serûm kerd mi. Dima mi rê çîyêk nêame vatene û ez berda koxûş. Vanê ke fermanê Wezaretê Edaletî esto ke nêeşkenê ma rê test bikerê. Ma terkê mergî bîyî. Seba ke doktorî waşt derheqê mi de tehqîqatêk dîya destpêkerdene. Eke tîya de mi rê çîyêk bibo sere de mudirê zîndanî pêro gardîyanî ci ra mesûldar ê. Pê tehqîqatî ma rê gef wanenê.''

Merve Aydogan da zanayene ke dest nîyeno mektuban û waştişnameyanê înan û yeno xîretkerdene ke têkilîya înan a teberî reyde bêra birnayene.