Çewlîg de serkêşîya DEM Partî û DBPyî çarçewaya aktîvîteyan 21ê Sibate Roja Ziwanê Dayîke ya Dinya de hunermendo kurd Rencber Ezîz ame yadkerdene.

Aktîvîteya ke banê DEM Partî yê Çewlîgî de ame kerdene Vervatoxa Komîsyonê Ziwan û Kulturî yê DEM Partî Cemile Turhali, îdarekarê DEM Partî û DBPyî û xeylê kesî tewrê ci bîyî.

Cemîle Turhali aktîvîte de nê vatî: ''Rençber Ezîz semedê ma erjêk o. Eke şarê ma heta ewro bi ziwanê xo qisey keno, nê de rolê ey gird o. Çunke ziwan têna qiseykerdiş nîyo. Tarîxêkê ziwanî est o. Şayî, keyf, dej ziwan de yenê pêser. La çi heyf ke rixmo ke dinya de hende kesî nê ziwanî qisey kenê, binê tehluleyê çînbîyayîşî de yo. Eke nê 20 serran de no ziwan mero qiseykerdene do çîn bibo.

No ziwan bi serran o estbîyayîşê xo rayra beno, bi huner û edebîyatî est o. Çunke no ziwanêko zengîn o. Kirmanckî ziwanêko zaf muhîm o. Tirkîya de  xeylê ziwanî sey kirmanckî binê tehlukeyî de yê. Çunke poltîkaya asîmîlasyonî ziwanan ser o yena rayraberdene. Eke yew ziwan nîno qebulkerdene û yeno qedexekerdene, ayetêkê Kuran-i Kerîmî yena înkarkerdene. Îqtîdar xo sey mulumanî hesibneno la heme ziwanê ma rê tehemul nêkeno.''

Badê qiseykerdişan derheqê cuyeya Rencber Ezîzî de sînevîzyonêk ame seyrkerdene û hunermendan Adar Ciwan û Erîvan Mûşî konser da.