Îbrahîm Gokçek seba ke qedexeyê konserî tedayanê dewlete yê vera hunerî bêrê wedaritene 323 rojan rojeyê mergî tepişt û dima ke mabên da çalakîya xo wedarîya Nêweşxaneyê Reyapî yê Îstanbulî. Gokçekî nêweşxane de dinyaya xo bedilnaye.

Seba Gokçekî Cemxane de merasîmêk ame kerdene. Merasîm de ke bi hezaran kesî tewrê ci biyî alayê sorî ameyî berzkerdene û cenazaya Gokçekî zî pê alayan ameye piştene.

Merasîm de bi yew vengî sloganê Grup Yorumî ameyî vatene. Merasîm de keyeyê Îbrahîm Gokçekî, keyeyê Hêlîne Bolek û Musrafa Koçakî, Wekîlê HDPyî Musa Pîroglu, xeylêk hunermend û temsîlkarê partîyan ê sîyasîyan zî amade bîyî.

Merasîm de sloganê ''Îbrahîm Gokçek bêmerg o'', ''Hêlîne Bolek bêmerg a'', ''Mustafa Koçak bêmerg o'' û ''Biciwîyo xoverdayîşê rojeyê mergî'' ameyî vatene. Merasîm bi deqayêkê rêzgirewtişî dest pêkerd û merasîm de deyîra 'Ugurlama' ya Grup Yorumî ya ke Gokçekî ci ra zaf hes kerdêne ameye vatene.