Şubeyê Îzmîrî yê ÎHDyî binpaykerdişê heqanê tepişteyan kerdî rapor. ÎHDyî par kerd ke 4 mengan de vera rûmetê merdimîye binpaykerdiş zêdîya û hûmara tepişteyanê ke testê înan ê vîrusî pozîtîf vejîyayî zêdîyena.
Şubeyê Îzmîrî yê Komeleya Heqanê Merdiman (ÎHD) derheqê zîndananê Îzmîrî de raporê 4 mengan amade kerd. Rapor hetê îdarekarê ÎHDyî yê Îzmîrî Bariş Işikî ra ame wendene. Goreyê raporê 4 mengan ê peyênan Zîndanê Buca, Zîndanê Şakranî, Zîndanê Domanan ê Îzmîrî û Zîndanê Menemenî de binpaykerdişê heqanê merdiman zêdîyayî.
Rapor de ame vatene ke hûmara tepişteyanê ke testê înan ê vîrusê Korona pozîtîf vejîyayî zêdîyena û nê zîndanan de çar menganê peyênan de teda û zorbazîya vera rûmetê merdimîye zêdîyayî.
Rapor de ame vatene ke muracat û gerreyî ganî cade biresê dezgehanê hewcedaran, îdareyê zîndanî derheqê şertanê fîzîkîyan û têgêrayîşan de kontrolêk bikerê. Têkilîya mabênê tepişteyan û keyeyan zî nêra astengkerdene.
Şubeyê Îzmîrî yê ÎHDyî waşt ke ganî tepişteyî ganî bierşawîyê zîndananê ke keyeyê înan rê nizdî yê, astengkerdişê radîo, kitab, kovare, mektuban ra ganî fek vera bidîyeno, xebitnayîşê ziwanê dayîke ganî pê qanûnî bêro pawitene, ganî heyetê neteweyî û mîyanneteweyî bi rehetî bieşkê zîndanan de kontrol bikerê, tecrîdê vera tepişteyan ganî cade bêro wedaritene.
