Serra 2019î her hetî ra meymandarîya zaf serebûtan û rojdeman kerde. AKP-MHPyî seba îqtîdarê înan dewam biko gonîya kurdan rijnaye. 2019 de kesêk nêeşkîya qala demokrasîyî û azadîye biko.

Wekîla HDPyî ya Şirnexî Nurane Îmîr rojdemê 2019î yê Kurdîstanî û Tirkîya ANF reyde ercna.
Tecrîd

Îmîre vat: "Ma eşkenê serra 2019î sey serra serkewtişî name bikê. Şarê ma vera polîtîkayanê înkarî xoverdayîşêko pîl mojna. Reyna xoverdayîşê grevê vêşanîye na serre ame meydan ke seba şiknayîşê tecrîdê Birêz Ocalanî bi. Grevê vêşanîye bi rayberîya hemsereka KCDyî û Wekîla HDPyî ya Colemêrgî Leyla Guven dest pêkerd û bi hezaran kesî tewrê grevî bîyî. Xeta Rayber Apoyî çareserîye û azadîya bi fikr û felsefeya Rayber Apoyî pêşkêşê dinya kena. Derheqê weşîya Rayber Apoyî de zaf qesawetî estbî. Coka no grev zaf girîng bi û vera faşîzmî serkewtişêko pîl bi."

Weçînayîşê Herêmîyî û Qeyûmî

''Bi weçînayîşanê 31ê adare HDPyî seba ke îqtîdarê AKPyî apey bêro stratejîyêka pîle kerde. Na stratejî di gaman ra amebî meydan. Gama yewîne apeygirewtişê şaredarîyan bîye ke hetê qeyûman ra amebî xespkerdene û gama diyîne zî metropolanê Tirkîya de binkerdişê blokê AKP-MHPyî bîye. Na stratejîye ser kewte. Reyna nê weçînayîşan de ame dîyene ke weçînayîşêkê bêkurdan nêro kerdene. Bi nê hawayî ma serkewteyî pîlî vistî xo destî. La kayê AKPyî nêqedîyayî. Şaredarîyanê ma ra 6ê ci hetê YSK ra ameyî xespkerdene, mazbatayê hemşaredaranê ma nêameyî dayene. Şaredarîyê ma yê pîlî sey Mêrdîn, Wan û Amed ameyî xespkerdene. Îradeyê şarê ma ame xespkerdene. La şarê ma vera ney her roje vejîya meydanan. Bi qeyûman sîstemê hemşaredarîye zî ame hedefkerdene. Xoverdayîşê cinîyanê kurdan ewro pêro dinya de yeno şinasnayene. Çunke cinîyî hînî her ca de rayberîye kenê."

Îşxal

"Tarîxê îşxalê Rojawanî 9ê teşrîna verêne tesadûfî nîyo. A roje vera Birêz Ocalanî komployê mîyanneteweyî ame kerdene. Rojawan de zî heman komplo ame kerdene. La gaî nêro vîrkerdene ke hêzanê Rojawanî DAÎŞ çin kerd. Têkoşînê cinîyan û ciwanan ê Rojawanî hîna lez nêno vîrkerdene. DAÎŞo ke hêzêko hegemonîk nêeşkîya ey çin biko sayê têkoşînê kurdan ra ame çinkerdene. Hêzê ke destûr da ke Rojawan bêro îşxalkerdene ganî naye bivisnê xo vîrî. Çunke bi nê îşxalî zaf qirkerdişî ameyî kerdene û bi sayan sivîlê ma ameyî qetilkerdene."