Înîsîyatîfê Kurdîstanî Bipawê (Defend Kurdistan)o ke tede xeylêk dezgehî ca gênê, şaristanê Dusseldorfî yê Almanya de seba rayraşîyayîşê 25ê hezîrane kombîyayîşêkê plansazîye kerd. Kombîyayîşî ra dima Hemsereka KON-MEDî Zubeyde Zumrut û Hemserekê KCDK-E Yuksel Koçî seba tewrbîyayîşê rayraşîyayîşî veng da.

Hemserekan bale ante ser ke hêrişê dewleta tirke yê vera Kurdîstanî erjanê exlaqîyan nêşinasnenê û vat: ''Seba ke cade peynîya nê şerê gemarinî bêro ma seferberîye îlan kenê. Ganî şarê ma dostanê xo reyde 25ê hezîrane de verê xo bido Dusseldorfî.

Dewleta tirke pê droneyanê çekdaran hêrişê Başûr û Rojawanê Kurdîstanî kena, cayanê sivîlan dana bombayan ver. Dîktator Erdogan sûcdarê şerî yo. Rejîmê şerî yê AKP-MHPyî vera gerîlayan gaz û çeka kîmyewîya şuxilneno. Heta ke Erdogan sûcanê şerî ra bêro muhakemekerdene ganî ma mîyanê seferberîye de bibê. Ma sey Defend Kurdistanî  çarçewa nê sûcanê şerî de seba ke rayaumûmîya mîyanneteweyîye bêra awankerdene seferberîye îlan kenê.''

Wina pawîyeno ke kurdîstanijî û dostê înan do 25ê hezîrane de pê otobus û wesayîtanê xo verê xo bidê Dusseldorfî û tewrê rayraşîyayîşî bibê. Girseyê şarî do saete 09.00 de verê Dusseldorf HBFyî de kom bibê û saete 11.00-11.30 de zî dest pê rayraşîyayîşî bikerê.