Wekîlê HDPyî Mehmet Ruştu Tîryakîyî derheqê Qanûnê Sansurî de ANFyî rê qisey kerd û pare kerd ke yew meşrûtîya nê qanûnî çin a.

Tîryakîyî da zanayene ke bi nê qanûnî çapemenîya herêmîye do bêra qelskerdene û kartê çapemenîye do bêrê betalkerdene. Tîryakîyî îfade kerd ke nê qanûnî reyde verê muhakemebîyayîşê rojnameger, xebatkaranê televîzyonî û şuxilnayoxanê medyaya dîjîtale bêro kerdene. 

Tîryakîyî vat: ''No qanûn gefêko cidî yo. Îqtîdar zaneno ke rayîrê bêvengkerdişê muxalefetî bêvengkerdişê îqtîdarî yo. Îqtîdarê AKP-MHPyî prosesê weçînayîşî de wazeno medyaya dîjîtale û platformanê têkilîye kontrol bikero û bi nê hawayî zî tekvengîye awan bikero. Nê qanûnî reyde hînî kesê wayîrê Telegram, Signal, Whatsapp ûsn. do bêrê kontrolkerdene, têkilî û agahîyê serê înan do bêrê vilakerdene. Yanî mîyanê nê qanûnî de kerdişê antîdemokratîkî est ê. Yew meşrûtîya nê qanûnî çin a. 

Xora çapemenîya azade do bi qerardarî xebetanê xo rê dewam bikera. Pêvînayîşanê komîsyonê nê qanûnî de seba çimtersnayîşî 21 rojnamegerî ameybî destbendkerdene û tayê înan ameybî tepiştene. La her kes zaneno ke çapemenîya azade nêeşkîyena pê destbendkerdiş û tepiştişî bêra bêvengkerdene. Îqtîdar zî do ney bimuso.''