Endama Meclîsê Ciwanan ê HDPyî Berfîne Çîçeka ke Îzmîr de 22ê adare de sereştişê keyeyan de ameye destbendkerdene, ameye tepiştene.

Çîçeke nezaret de 24 saete  raştê qedexeyê avûkatan ameye. Çîçeka ke bi îdîaya ''endamîya rêxistine'' û beyananê ''şahîdanê eşkera û nimiteyan'' ameye sûcdarkerdene Dagerîya Ceza Sulhî de ameye tepiştene û şawîyaye Zîndanê Qefilnayeyî yê Cinîyan ê Şakranî.

Sereştişê keyeyan de pîya bi Çîçeke, Endamê Heyetê Rayberdişê Merkezî yê HDPyî Îdîl Ugurlu, Dayîka Haştîye Behîye Yalçin, Selma Demir, Hayate Izgi, Newroze Çelik û Bariş Kirmizitaş ameyî destbendkerdene.

Înan ra Bariş Kirmizitaş eynî roje ame veradayene, 5 kesê bîn ke Mudirîya Polîsan ê Îzmîrî de yenê tepiştene,  24ê adare de do sewqê edlîye bibê. Seba ke pêvînayîşê avûkatan qedexe yo nîno zanayene ke nê kesî pê çi yenê sûcdarkerdene.