Dayîke Sîdare Tutmaz 34 serrî yo gêrena cenazaya lajê xo. Dayîke Sîdare qezaya Dêrikî yê Mêrdînî ra yo. Lajê aye Seyfettîn 1980 de tewrê gerîlayan bîyo. Dima ke Setfettîn Tutmaz şi koyan qoricîyan keyeyê Tutmazî rê zorbazîye kerd û keyeyî koçê merkezê şaristanî kerd. Tutmaz 1990 de şehîd bi. Dayîke Sîdare televîzyonî ra musaya ke lajê ci şehîd bîyo. A nêeşkaye cenazaya lajê xo bigêra. Dayîke Sîdare ajansê ma rê qisey kerd.

Dayîke Sîdare seba ke esteyanê lajê xo bivîna bi serran o têkoşîn kena. Tornê aye Sîpan Tutmaz (Rûgeş Zinar) zî çele de Zap de şehîd bi. Sîdare pare kerd ke ê nêeşkayê cenazaya Sîpanî zî bigêrê.

Sîdare pare kerd ke roja ke aye eşnawitibi lajê ci şehîd bîyo polîsan eşt keyeyê ci ser, ferdanê keyeyî rê îşkence kerdo û vat: ‘’Tena ez ne pêro ferdê keyeyê mi raştê îşkenceyî ameyî. Polîsan vat ‘Şima Seyfettîn ça ra bîyarê bivînê.’ Qîrayîşê lajê mi hema zî goşanê mi de yo.’’

Sîdare bi wesîleya Roja Dadîyan vat: ‘’Sey dadîyêke parçeyêk zî bibo ez esteyanê lajê xo wazena. Tena ez bizana ke o kamca de yo. Şehadetê ey ra dima ma şîyî pers kerd ke cenaza bigêrê. La ma cewabêk nêdî. 2017 de ez şîya Beslîs. Dozgerî vat ke ‘Ti çira ameya?’ Mi vat ke ez ameya ke lajê xo bivîna. Dozgerî vat ‘Gonîye bidê, mengêke ra dima bêrê lajê xo berê.’ La hema zî agahîye çin a. 

Ez tena wazena ke lajê xo bivîna û ci rê gorêkî abikera. 34 serrî yo ma gêrenê cenaza, 34 serrî yo ma nêeşkenê şînê ronê. Esteyêk zî bibo ez razi ya. Wa no dejê serran biqedo. Cenazaya tornê mi zî vindîbîyaye yo. Teslîmnêkerdişê cenazayan îşkence yo. Sey dadîyêke bi serran o ez gêrena esteyanê lajê xo. 

Esteyê lajê mi do bibê dîyarîya tewr pîle ya Roja Dadîyan. Ez haştîye û gorê lajê xo wazena. Seba haştîye wa dewlete game bierza.’’