Dewanê Çewlîgî aqîtê tûyan o ke cinîyî virazenê hem tradîsyonêk o hem zî sembolê têkilîya qedîme ya bi xoza ano ca.

Çewlîg de her serre hamnanan de amadekarîya viraştişê aqîtê tûyan yena kerdene. Viraştişê aqîtê tûyan zehmet o la bereketîn o. Cinîyî serê sibayî dest pê karî kenê, tûyan arê danê, mîyanê berdoşan de anê pêser, wişk kenê, kenê mîyanê qutîyan û bi nê hawayî seba zimistanî amade kenê.

Zubeyde Yaşa bi serran o aqîtê tûyan virazena. Zubeyde ajansê ma rê vat: ‘’Xoza fîraz a, her çîyê ci derman o. La îklîm vurîyeno, darî kêmîyenê, tûyî zî hinî sey verî çin ê.’’

Zubeyde îfade kerd ke ê serê sibayî saete 5 de şîyar benê û vat: ‘’Aqît seba mîde, cîgeran û xeylê nêweşîyan derman o. Tayê kesî seba rotişî  aqîtî virazenê la ma tena seba xo virazenê. Ma sey cinî û camêrdan xebitîyenê. Ma zaf kede danê. Dewan de bi taybetî cinîyî seba ke debara xo bikerê aqîtî roşenê. Xoza û nê darî seba ma pêroyînan çimeyê debare yê. Ma her çî bi xo virazenê. Ma xo bi keda xo weye kenê.

Xoza her çî dana merdiman. Ganî ma xozaya xo bipawê. Sey verî tûyî zî zêde nîyê. Rixmê ney zî ma nê tradîsyonî rê dewam kenê.’’