Bi wesîleya serrgêra 100ine ya Serewedaritişê Şêx Seîdî yê 1925î, serkêşîya KNK, CÎK û Enstîtuyê Kurdan de şaristanê Kolnî yê Almanya de mîtîngêko girseyî ame kerdene. 

Mîtîng de Şêx Seîd û embazê ci yê ke 29ê hezîrana 1925î de ameybî dardekerdene ameyî yadkerdene, fotografê înan ameyî akerdene.

Hemserekê KNKyî Ahmet Karamusî ard ziwan ke ewro têkoşînê Rayber Apoyî rêçê Şêx Seîdan ser de yeno kerdene.

Hemserekê CÎKî Şevket Çakirî parre kerd ke seke Şêx Seîdî waştibi ewro tornê ci yê kurdî qesasê înan gênê.

Hemesereka KCDKyî Zubeyde Zumrut ard ziwan ke Rayber Apoyo ke têkoşînê Şêx Seîdî ra dersî girewtî û bi têkoşînê xo têkoşînê azadîye aver berdo.

Tornê Şêx Seîdî Basrî Firatî derheqê Serewedaritişê 1925î de agahîyî dayî.

Sîyasetmedar Îdrîs Balukenî da zanayene ke Rayber Apoyî seba çareserîya meseleya kurdan prosesêk dayo destpêkerdene û ganî dewlete zî hinî mesuldarîya xo bîyara ca.

Dima Hozan Aydin û Dengbêj Marufî vejîyayî sehne ser. 

Dima netîcenameyê Konferansê ‘’Şêx Seîdî û Cemîyetê Azadîye: Tarîx, Vîr û Îtîrazo Kolektîf’’ ame wendene. Netîcename de ame waştene ke wa cayê goranê Şêx Seîd û embazanê ey bêrê eşkerakerdene, arşîvê ê çaxî bêrê akerdene, cenazayî wa teslîmê keyeyî bêrê kerdene, wa nînan rê heqaret nêro kerdene, seba caardişê edaletî wa mekanîzmayê dewlete têbigêrê.

Netîcename de bale ameye antene Vengdayîşê Haştîye û Komelê Demokratîkî yê Rayber Apoyî ser û ame vatene ke ganî paştî bêra dayene xîretê haştîye. Netîcename de venga dewketa tirke dîyaye ke seba haştîye wa hêverî hûrmetê merdeyanê kurdan bikera û cayê goranê lîderanê kurdan eşkera bikera.