Roniştoxanê Kampa Multecîyan a Şehîd Rûstem Cûdîyî ya Mexmûrî derheqê Vengdayîşê Haştîye û Komelê Demokratîkî yê Rayber Apoyî û qewimîyayîşanê peyê ney de ajansê ma rê qisey kerd.

Helîm Îşekî vera bêvengîya Erdoganî ya serê prosesî nêrazîbîyayîşê xo mojna û vat: ‘’Rayber Apo wazeno ke meseleya kurdan çareser bikero. Hêverî Bahçelîyî seba haştîye gamêke eştibî la dima nê gamî samîmî nêbîyî. PKKyî adirbirnayîş îlan kerd la Tirkîya bi hêrişan cewab da ney. Ganî operasyonê Tirkîya zî biqedê. Rayber Apoyî verê cû zî seba haştîye gamî eştibî. Dewleta tirke tim bi çekanê kîmyewîyan ê serê gerîlayan cewab da ney.’’ 

Qesrî Şirîşeyi ard ziwan ke Rayber Apo tena prosesî aver beno û vat: ‘’Hema zî hetê dewlete gamêka zelale nêeşte. PKKyî zî bire daye ke çekan war verdo. Bala şarê kurdî serê dewlete de ya. Ma tîya ra fam kenê ke dewleta tirke seba afernayîşê vengîyêke pawena. Şerê mabênê Îsraîl û Îranî tesîrê pêro dinya keno. Ma sey kurdan terefgîrê nê şerî nîya. Ma xeta Rayber Apoyî de wazenê ke heqanê xo bivisnê destî. Şarê Rojhelatê Mîyanênî bi taybetî şarê kurdî ganî meseleyanê xo çarçewa vengdayîşê Rayber Apoyî de çareser bikerê.’’