Vera polîtîkayanê talanê ekolojîkî yê ke prosesê peyênî de zêdîyayî Amed de bi tewrbîyayîşê desan kesan Meclîsê Ekolojî yê Amedî ame ronayene. Endamanê meclîsî bale ante munaqeşeyanê haştîye ser û vat,"Kam ke wazeno merdimî de haştîye bikero gerek xoza de zî haştîye biero." û veng da ke wa xebatê xebatê sey awbend, birnayîşê daran û madenî yê ke binê nameyê "asayîş"î de yenê kerdene, bêrê vindarnayene û polîtîkayê ke xoza rê feyde kenê, bêrê caardene.

Endamanê Meclîsî ra Elîda Zerî bale ante tekîlîya prorsesê haştîye û xoza ser û vat, “Her nalçixo ke dîyeno xoza rê eslê xo de vera prosesê haştîye darbeyêk a.”

Îdarekaranê Komele ra Mazlûm Yilmazî ard ziwan ke polîtîkaya hêrişkare ya vera xoza xizmetê şarî nêkena û vat, "Herême de adirbirnayîş est o, tehdîdê asayîşî çîn o. Coka gerek hêrişê vera xoza bêrê vindarnayene."

Meheme Yilmaz zî ard ziwan ke çîyo ke zirar dano xoza, zirar dano merdimi zî û vat: "Haştîye çîyêka birumet a, semedê her kesî hewce kena. Haştîye dar a, ko yo û aw a. Haştîye ewro semedê pêro ganîyan hewce kena. Gerek verî dare de, herre de haştîye bêro kerdene. Gerek ma pêro pîya wayîrê xoza bivejê. Dewlete gerek na nuqta de hinî game bierzo."