Şirnex de 7 serrî yo herêmanê Besta, Cûdî û Gabarî de darî birîyenê. Qezaya Elkê ya Wanî de zî qirkerdişê daran yeno kerdene. Mudirîya Daristanan û Zîretî ya Wanî bi belgeyê ‘Ciwankerdiş û asayîşî’ waşt ke wa dewa Hemka ya Elkê de darî bêrê birnayene.

Dewijan îmzayî arê dayî û berdî Fermandarîya Cendirmeyan a Elkê. La Fermandarîye dewijan rê vat ke darî do bêrê birnayene û rotene.

Dewa Hemka taybetmendîya xo ya cografîke ra semed warê vewrêse de yo. Dewijan rê Îbrahîm Acarê 60 serrî îfade kerd ke ê birnayîşê daran qebul nêkenê û vat: ‘’Xêrê nê daran ra ma eşkenê dewe de bimanê. Darê ma cara ciwan ê. Eke darî bêrê birnayene ma do neçare bimanê ke koç bikerê.’’

Dewij Nîhayet Acarî ard ziwan ke bi bahaneya asayîşî darî birîyenê. Acarî vat: ‘’Eke darî çin bê hewa do germ bibo û wareyê cuya ma do çin bibo, heywanê ma do vêşan bimanê. Ma birnayîşê daran qebul nêkenê. Ma do heta peynî erdê xo bipawê.’’