Qezaya Pasurî ya Amedî de warê hemparî yê mera yê taxanê Agaçli, Kaynak û Narlica de yeno waştene ke waranê mera de santralê enerjîya tîje bêro viraştene. 

Eşkera bi ke şîrketa projeyî seba girewtişê raporê ÇEDî fotografê xîlafî mojnayê. Baroyê Dîyarbakirî derheqê babete de gerreyê sûcî kerd.

Endama Komîsyonê Şaristanî û Xoza yê Baroyê Dîyarbakirî Avûkate Berfîne Kilinç pare kerd ke proje do heywankarîye biqedîno û vat: ‘’Yeno waştene ke tîya de santralêko pîl bivirazîyo. Raporê şîrkete xîlaf o. Xora ma mehkeme rê îtîraz kerd. Ma do prosesî teqîb bikerê û tim hetê dewijan de bibê.’’

Dewijan ra Şermîne Şekera ke muhendîsa zîretî ya îfade kerd ke merayê înan yenê îşxalkerdene û keyeyê înan binê tehluke de bimanê. Şermîne vat: ‘’Ê wazenê ke ma erdê ma ra dûrî bifînê. Yew faydeyê nê projeyî zî çin o.’’

Dewijan ra Hatune Demîrhana 70 serrî vat: ‘’No erd erdê ma yo. Ma tîya de çîyê bizerarî nêwazenê. Şîrketî menfaetanê xo pawenê. Ê wazenê ke ma tîya ra şorê. Ma do destûr nêdê nê projeyî.’’

Nûrîye Şekera 75 serrî zî vat: ‘’Ê seba menfaetanê xo wazenê na dewe çin bikerê. Ma bi heywan û baxçeyanê xo debara xo kenê. Ma do qetî destûr nêdê nê projeyî. No proje do zerar bido pêro gandaranê tîya. Eke warê ma yo kesk çin bibo ma do çita bidê heywananê xo?’’