Hemsereka Komeleya Çimdarîye û Cigêrayîşî ya Koçî ya Mezopotamya (GOÇ-DER) Medya Alkan vat ke armancê polîtîkayanê koçî yo esas vengkerdişê Kurdîstanî yo.

Medya îfade kerd ke Planê Şark Islahatî ra nata dewlete seba ke Kurdîstan de demografî bivurna têgêrena, polîtîkayanê şerê taybetî ana ca. Medya vat: ‘’Ma pêro zanenê ke 90an de senî dewê Kurdîstanî ameyê vengkerdene. Yeno waştene ke şaristanê Kurdîstanî bi polîtîkayanê koçkerdişî nasnameyanê xo ra dûrî bêrê vistene.

Serranê peyênan de bi taybetî koçê ver bi Ewropa zêdîyayî. Na rewşe bi destê dewlete yena teşwîqkerdene. Dewlete nêwazena ke ciwanê kurdî xo rêxistin bikerê.’’

Medya bale ante koçanê wextê şerî ser û vat: ‘’Meseleya koçî tena meseleya şarî nîya; meseleya dewlete ya zî. Senî ke dewî ameyî vengkerdene ganî agêrayîşê ver bi dewan zî bêro kerdene. Muxatabê ney zî dewlet a.

Çarçewa hewteyê koçî de ma şîyî Meclîsî û ma partîyanê sîyasîyan de pêvînayîş kerd. Ma seba agêrayîşê ver bi dewan veng da. Hem koçê ekonomîkî û sîyasîyî hem zî koçê rejîmî est ê. Agêrayîşî reyde ma eşkenê verê nînan bigêrê.’’