Çewlîg de ocaxê madenan û projeyê awbendan zêdîyenê. Herêmanê Gêxî û Cehenemê Reşî de madenkarîye zêdîyena û darî birîyenê. Şaristan de Santralê Enerjîya Tîje (GES) awan benê û warê xoza yeno çinkerdene.

Rixmê nêrazîbîyayîşanê şarî zî hûmara projeyan zêdîyena û warê daristanan kêmîyeno. Çewlîg de nika 113 warê madenî est ê. Bi taybetî dormeyê dewa Servînî ya qezaya Dara Hêniyî û qezaya Gêxî de warê madenî zêdîyenê. 

Sekreterê Heyetê Koordînasyonê Şaristanî yê TMMOByî Canfidal Boldaşî derheqê babete de ajansê ma rê qisey kerd. Boldaşî ard ziwan ke polîtîkayê bêdaristankerdişî bi sîstematîkî yenê kerdene û şaristan de talan yeno kerdene.

Boldaşî vat: ‘’Çewlîg de bi nê projeyan cuya herême yena tehdîtkerdene. Madenkarîye û projeyanê enerjî reyde herême de koçkerdiş zî zêdîyeno. Ma sey muhendîsan madenkarîye bi temamî red nêkenê; la ganî nê karî goreyê îhtîyacanê şarî bêrê kerdene û semedê nînan xoza nêra talankerdene.’’

Boldaşî vist vîrî ke Çewlîgî ra xeylê madenî yenê vetene û vat: ‘’Dewa Olmezî ya Gêxî de madenê zerdî est ê. Tîya de şîrketê madenan vengkerdişê herême armanc kenê. Kerdişê madenkarîye bi hawayêkê raştî tesîrê zîret, heywankarîye û awe kenê. Ancî nê xebatî tesîrê heywanan, weşîya madenan û baxçeyan kenê. 

Ganî karê madenan de hûrmetê xoza û komelî bêro kerdene. Madenkarîye bi ferasetê kolonyalîzmî ney ganî çarçewa îhtîyacanê şarî de bêra kerdene. Ganî zengînîya xoza ya Çewlîgî bipawîya û verê texrîbatî bigêrîyo.’’