Hemkarîya Anonîme ya Petrolanê Tirkîya (TPAO) û şîrketa bi nameyê TPÎC 5 serranê peyênan de qezayanê Hezro, Farqîn, Licê û Pasûrî yê Amedî de gêrenê petrolî.

Şîrkete Licê û Pasûr de seba karê sondajî darî birnayî, rayîrî viraştî. Şîrkete nika zî çim verdayo meraya dewijan. Şîrkete hewteyê vîyarteyî de dewa Bilyasa Jore ya Licê de dest pê karê sondajî kerd. Dewijan şîrkete hişyar kerd û vat ke eke şîrkete wina dewam bikera ê do dewa abikerê.

Dewijan ra Ahmet Fîdanî ajansê ma rê qisey kerd û dîyar kerd ke dewe warê mera yo û karê sondajî çimeyê înan ê debare çin keno.

Fîdanî da zanayene ke karê sondajî nêzdîyê dewe de yenê kerdene, ê bi vengê makînayan şîyar benê û vat: ‘’Wexto ke ez vejîyaya teber mi dî ke temamîya binê koyî de makînayê sondajî est ê. 

Deşte ra heta binê koyî xeylê bîrê sondajî ameyê akerdene, dormeyê înan zî bi betonî gêrîyayo. No ca meraya heywananê ma ya. Eke no ca bêro çimkerdene çimeyê debare û warê cuye do biqedê. Eke ma nêeşkê heywankarîye bikerê ma do neçare bimanê ke koç bikerê.’’

Ahmet Fîdanî îfade kerd ke nê karê şîrkete wextêkê dergî ra nata dewam kenê, bi cigêrayîşê petrolî û madenî zêdîyayê û vat: ‘’Ma wazenê dewe ra koç bikerê. Ma tîya de dadîya xo ra bîyê û wazenê tîya de biciw’iyê. Se beno wa bibo ma do dewa xo nêteriknê. Erdê ma pêşkêşê sermaye yeno kerdene. Erdê ma cara talan bîyo, hinî ganî no talan bêro vindarnayene.’’