Koyê Hesandinî yê qezaya Pasûrî yê Amedî de seba viraştişê qereqolî rayîrî yenê viraştene. Şîrketa bi nameyê Kulp Madencilikî par waştibi ke herême de karê sondajî bikera û la dewijan nêverdabi. Nika zî herême de xebata rayîrviraştişî yena kerdene. Dewijan dîyar kerd ke nê rayîrî seba viraştişê qereqolî û madenî virazîyenê. 

Avûkatan par muracatê Wezîrîya Dormeyî kerdibi û cewabê wezîrîye de amebi vatene ke şîrkete 2008 de raporê ÇEDî girewto. Avûkatan vat: ‘’ÇEDo ke mîyanê 5 serran de nêşuxilîyeno betal beno. La şîrkete dima ancî karê madenî kerd. Ma o çax musayî ke rayîrî tena seba qereqolî ney seba madenî zî virazîyenê.’’

Karê viraştişî 7 rojan dewam keno û bi desan leşkerî bi kepçeyan xebitîyenê. 

Avûkatanê Baroyê Amedî ra Eyup Akdenîzî îfade kerd ke bi îlegalî no rayîr virazîyeno û amadekarîya madenî yena kerdene.

Dewijanê Şirnazî ra Remzî Turanî vat: ‘’Ganî her kes wayîrê tîya vejîyo. Bi nê karî xozaya ma yena talankerdene.  Xora baxçeyeê ma ameyî perîşankerdene.’’

Şirnazî ra Nedîm Emreyî vat: ‘’Ma seba heywananê xo û xozaya xo tîya de yê. Eke tîya de karê madenî bêro kerdene awe do nêmana û Hesandin do çin bibo. Ma do nêverdê ke xozaya ma bêra çinkerdene. Ma do tîya de erdê xo bipawê.’’

Cevahîr Tekînî vat: ‘’Seba ke merdimî koç bikerê ê wina kenê. Ma tîya de hê xo ver danê. Ma do dewaya xo ra fek vera nêdê. Wa şar wayîrê nê erdî vejîyo û bi vengdayîşî verê xo bido Hesandinî.’’