Îbrahîm Kaypakkaya, serr 1949 de yew dewa Çorumî de ame dinya. Pîyê ci kerdkaro feqîr bî. Pî û maya ci o hîna hîrê serrî bîyî cîya. Îbrahîm Kaypakkaya sinifa yewine û dîyine dewa Karamahmutî de, sinifa hîrêyine zî dewa Ortakişla de û sinifa çarine û pancine dewa Alaca de wende.

Îbrahîm Kaypakkaya domanîya xo de kesêke sukut û giran bî. Wendişî ra zaf hes kerdêne û çi bikewêne dest wendêne. Wexto ke mekteba verêne wende, kerdîbî xo sere ke bibo mamosta. Kewt îmtihananê dibistana şevînî ya bêpere yê dewlete û serkewt. Mekteba Malîmîya Hasanoglanî ya Ankara de  dest bi wendişî kerd.  Wexto ke mektaba malîmîye de wendêne hamnanan şîyêne welat û karanê dewa de xebitîyêne. Mîyanê ey û dewijan tim baş bî û çiqas dest ra ameyêne heme dewijan ra hetkarîye kerdêne.

Îbrahîm  Kaypakkaya fikirê şoreşî yê verênî  Mekteba Malîmîya Hasanogluyî de nas kerdî. Na mektebe ra bi dereceyêko berz bî hehzun. Badê kewt îmtihananê Mekteba Malîmîya Berze ya Çapa ya Îstanbulî û qezenc kerd. Tîya de hem hetê fikir, îdelojî û hem hetê pratîkî ra gamêka girde eşte. Hem mektebe de hem zî dewanê der û dormeyî de têkilîyêka başe ronaye. Rîyê xebatanê sîyasîyî ra hetê polîsan ra ame fîşkerdene. Rexmê her çî na mektebe de karê xo yê sîyasî dewam kerdî û Kulubê Fikirî awan kerd, bî hemserek nê kulubî. Heta ke mektebe ra ame dûrîkerdene hemserekîya nê kulubî dewam kerde.

Mektebe ra eştişî ra dima wextêk otelêk de xebetîya û seba îdarekerdişê xo dersê matematîkî dayî wendekaran. Îbrahîm  Kaypakkaya çalakîyanê vera Fîloyê 6înî û Pazara Goninî tewr virnîye de rayra şîyêne. Serranê 1969-1970 de kovaraya Turk Soluyî de derheqê çalakîyanê karker û dewijan xeber û nuşteyî nuştî. Têkoşînê karkeranê girdî yê 15-16 Hazîrane seba têkoşînê sîyasîyê Îbrahîm  Kaypakkayayî cayêko muhîm gênê. Nê têkoşînî ra tepîya Îbrahîm  Kaypakkaya  rêxistinê PDA/TİİKPyî ra visîya.  Serra 1972 de TKP/ML awan kerd.

Îbrahîm Kaypakkaya heta ame pêgirewtene herêmanê sey Malatya, Antep û Dêrsim de xebateê xo yê sîyasî dewam kerdî. Îbrahîm Kaypakkayayî dewijan rê şoreşê Çîn, Vîetnan û şoreşê teşrîna verêne vatêne.Wexto ke  Îbrahîm Kaypakkaya, Alî Haydar Yildiz ve Muzaffer Oruçolu Dêrsim de xebatê sîyasî kerdêne yew çalkîye de hevalê xo  Alî Haydar Yildiz kerd vîndî û rîyê îxbarê yew malîmî ra Îbrahîm Kaypakkaya yew keye de ame pêgirewtene.

Îbrahîm Kaypakkaya ver de berd Elezîz badê zî berd Dîyarbekîr û êdî îşkenceyan dest pêkerd. Kaypakaya semedo ke zaf têsîrê serdî -vewre de- mendo di lingê ci tîya de ameyî cirakerdene. Tewir bi tewîr îşkenceyî ameyî kerdene labelê tek çekuye fekê Kaypakkayayî ra dewlete nêeşkaye bigêra. Bi mengan îşkenceyan dewam kerd labelê  Kaypakkayayî dest kerd xo û derheqê rêxistina xo de zanayîşî nêdaye. 18ê Gulane de  îşkenceyan de Kaypakkaya ame kiştene û 19ê  Gulane de xebere daye pîyê ci ke bêro meyîtê Kaypakkayayî bigêra. Dewlete pîyê ci ra va lajê to xo kîşto yanî întîxar kerdo. Tabî ne pîyê ci ne zî şarî bi naye bawer kerd. 

Fikir û tezê Îbrahîm Kaypakkayayî yê seba persê kurdan û kurdîstanî, qirkerdişê armenîyan, elewîyan û kerdkeran goreyê şoreşwananê bînan cayêke bîn de manenê. Îbrahîm Kaypakkaya bi vindetiş û îdolojîyê xo yê pêtî ewro zî roşnîye dano têkoşînanê azadîye.