Başûr de PDK 30 serrî yo xeta îxanetî rayîr a beno. PDK keno ke bi zûran û etîketanê viraşteyan îxanetê xo binimno. Her eşkerayîya PDKyî bena sebebê nakokîyan.

Wezîrê Karanê Zereyî yê Herêma Kurdîstanî Rêber Ehmedî tay dezgehanê çapemenîye rê vat: ''Ganî bi kêfweşî ez vaja ke hukmatê Iraqî bire daya ke PKK rêxistinêka qedexekerde ya. Seba ke şar û dewijê ma raştê meseleyan nêrê ganî PKK nê herêman biterikno. PKK çimeyê pêro meseleyan o.

Ehmed nê taktîkê sûcdarkerdiş û hedefkerdişî Anqara de musayo. Ehmedo ke 1968 de dadîya xo ra bîyo 1997 de Muhendîsîya Înşatî ya Zanîngehê Selaheddînî qedînayo û dima warê asayîşê neteweyî de master kerdo.

Ehmed wexto ke endamê Yewîya Muhendîsanê Kurdîstanî bîyo tewrê Parastinî bi. 1998 de o bi şêwirmendê îstîxbaratî yê Mesrûr Barzanîyî, 2000-2005 de bi serekê Ajansê Îstîxbarat û Parastinî yê Herêma Kurdîstanî. 2005 ra  heta 2012î mîyanê Parastinî de ey dîrektorîya analîzan kerde. 2009 de zî bi Wezîrê Karanê Zereyî. 

Ehmed bi pirdê mabênê MÎT û Parastinî. Wezîrê Karanê Teberî yê Tirkîya Hakan Fîdanî wexto ke Bexdad û Hewlêr zîyaret kerdî hêverî Ehmed dî. Têkilîya Fîdan û Ehmedî 1994 de yanî wexto ke Başûr de baregehê Tirkîya yê verênî ronîyabî dest pêkerd. 

Ehmed heman wextî de serkêşanê polîtîkayanê qirkerdişê rojnamegeran, faîlanê meçhulan, tepiştiş û destbendkerdişan  û krîzê ekonomîkî ra yo. Ehmedî nê polîtîkayî bi taybetî wextê zêdîyayîşê nêrazîbîyayîşê şarî de mojnayî. Wexto ke aktîvîstê Behdînanî tepişîyayî zîndananê PDKyî raştê îşkenceyî ameyî.

Ehmedo ke Şorişê Rojawanî de paştî nêdaya hêzanê welatperweran ronayoxanê Pêşmergeyanê Roje ra yew o. Pêşmergeyê Roje hêzê paramîlîter ê, pabesteyê dezgehanê leşkerîye yê Iraq û Wezîrîya Pêşmergeyan nîyê. Ehmed nê hêzan rêxistin keno, perwerde keno û tede cagêno. PDK zî nê hêzan vera PKKyî Behdînan û Herêmanê Pawitişî yê Medya de cakeno. Pêşmergeyê Roje îşxalê tirkan rê serkêşîye kenê.

Ehmed vera Şingalî zî têgêra û seba Peymana 9ê Teşrîna Verêne ya 2020î nameyê hukmatê Başûrî ser o îmza eşte. Nika zî Ehmed seba ke na peymane bêra caardene her çî keno.

Ehmed seba ke şorişgêrê Rojhelatê Kurdîstanî yê ke Başûr de yê bitepişîyê îstîxbaratê Îranî rê zî xizmet kenoı. 2021 de wextê wezîrîya Ehmedî de Endamê Komîteya Merkezî ya PDK-Î Musa Babaxanî Hewlêr de otêlêke de hetê Îranî ra kişîya. 

Başûr de merkezê îşkenceyan ê sey zîndananê Akre, Mesîf û Spîlkê est ê ke Ehmed mîmaranê Zîndanê Akrê ra yew o. Ehmedî wextêk îdarekarîya nê zîndanî kerde.

Ehmed 2022 de PDKyî ra bi namzedê Serekkomarîya Iraqî. La namzedîya ey hetê mehkemeya federale ya Iraqî ra seba ke vera Ehmedî sûcdarîyanê 'kiştiş û remnayîşî' ra dewayî est bîyê nêameye qebulkerdene.