Têkilîyê ke Tirkîya çarçewa 'Projeyê Rayîrê Averşîyayîşî' de Iraq de kerdê ver bi warê leşkerî şinê. Nê têkilîyî zafêr vera Têgêrayîşê Azadîye yê Kurdîstanî yenê kerdene. Peymana ke Anqara û Bexdadî çend rojî verî bi nameyê 'Metnê Pêkerdişî' îmza kerda rayîrê ney kena a ke Tirkîya leşkeranê xo bişawa Bexdadî. Peymane de seba sewqê leşkeran ê ver bi Başûrî zî bahaneyêka fermîye ameye peydakerdene. Wezîrê Karanê Teberî yê Iraqî û endamê PDKyî Fûad Hisênî da zanayene ke Iraq kewto prosesêkê neweyî. 

Iraq de mabênê Tirkîya û Iraq de Bexdad û Başîka de merkezê koordînasyonê hemparî awan bi. Goreyê ney artêşa tirke goreyê madeya çarine ya peymane do nêzdî de leşkerê tirkî Bexdad de ca bibê. Goreyê madeya pancine û şeşine zî mabênê wird dewletan de îstîxbaratî do bêrê parekerdene.

'Odaya Operasyonî ya Hempare' ya ke tede nê planî yenê viraştene nê kesan ra yena pê: Wezîrê Karanê Zereyî yê Tirkîya Hakan Fîdan, Musteşarê MÎTî Îbrahîm Kalin, Wezîrê Karanê Teberî yê Iraqî Fûad Hisên, Wezîrê Karanê Zereyî yê Herêma Kurdîstanî Rêber Ehmed, Wezîrê Pawitişî yê Iraqî Sabît Abbasî, Serekwekîlê Îstîxbaratê Iraqî Vakkas Muhammed Huseyîn Ek Hadîthî.

Dewleta tirke bi qiseyê 'Ma do Başika teslîmê Iraqî bikerê' estbîyayîşê xo yê Mûsilî bi hawayêkê dîplomatîkî eşkera kerd. Kanalê sey Haberturk û CNN xeberanê xo yê serê peymana Iraq-Tirkîya de mojnenê ke dewleta tirke Başika ra ber zî hîna zaf cayan de do leşkeranê xo cabikera. 

Hukmartê Sûdanîyî bedelê sozanê serê ekonomî û enerjî de polîtîkayê Anqara tesdîq kerdê û peymana newîye îmza kerde. Çarçewa mekanîzmaya plankerde de yeno  vatene ke Anqara hêzo ke do bişawa Bexdadî amade kerdo. Yeno vatene ke no hêz binê koordîneya Hakan Fîdanî de do bixebito.

Hukmatê Sûdanîyî bi îmzakerdişê Metnê Pêkerdişî Iraq  vist prosesêko krîtîk. Pêkerdişî ra dima Fûad Hisênî verê kamerayan de vervatoxîya îşxalê tirkan kerde. Fûadî vat ke 'xizmetêko senîn' do Başûr û Iraqî rê bêro kerdene. 

Hetê bînî ra tewirê şîayan o pasîf ê vera îşxalê tirkan hetê rayaumûmîye ra nêno dîyene. 'Tewiro zixm' zî hetê dormeyanê sîyasîyan ê Iraqî ra bi eşkerayîyan yeno dîyene.