Roniştişê 6. yê dewaya ke Wekîlê AKPyî Îbrahîm Halîl Yildiz û merdimanê ci keyeyê Şenyaşîrî ra 3 tenî qetil kerdbî Mehkemeya Cezaya Girane ya 3. ya Meletî de ameye dîyene.

 Roniştiş de şahîd Murat  Kaya ame goştarîkerdene. Kayayo ke qewimîyayîşî ra hîrê rojî dima îfade dabi badê 2 serran û nêmî semedê goştarîkerdişî ame vengdayene.

Kayayo ke bi sîstemê SEGBIS tewrê mehkeme bi ard ziwan ke vatişê Yildizî yê wexto ke ê şîyî dikan Şenyaşaran vat 'şima zanê ma kamê?  ma rêxistinî ra yê' raşt nîyo. Kayayî vat: ''Dikan de keyeyî ra kesêkî wina nêvat û pêrodayîşêk zî nêvejîya. Dima ra teber de her di hetan zî yewbînan rê heqaret kerd.''

Badê şahîdî avûkatê Şenyaşaran Hîdayet Enmekî ard ziwan ke vatişê şahîdî zî  ramojnenê Yildiz raşt nêvano û waşt ke muwekîlê ci Fadil Şenyaşar wa bêro veradayene. Avûkatanê Şenyaşaran ra Bulent Duranî zî vist vîrî ke îfadeyê Mustafa Kayayî verî ameyo girewtene la dosya de nêameyo cakkerdene û vat: ''Dozgerîye tay delîlan ano tayînan nêano. Cigêrayîşê Serdozgerîya Komera ya Riha goreyê huqûqî nêbi. Mehkemeya şima zî bêhuqûqîye kena. Dozger goreyê nayî mutaala hazir keno. Coka ma zaf qerqilîyenê. Eşkerayo ke yeno waştene serê tay çîyan bêro girewtene. Keyeyê Yilzidî yeno pawitene.''

Avûkatan waşt ke cipêrsayîşo ke bîyo di cayî wa bibo yew û bêro hîrakerdene û derheqê Îbarahîm Yildizî heme delîlî bêrê arêdayene û dosya de bêrê ca kerdene.

Heyetî heme waştişî red kerdî û roniştişo bîn 2ê nîsane rê pey de eşt.

.