Roniştişanê ewroyî yê Kongreya KNKyî de yewîya neteweyîye, dîyalogê mabênê kurdan, cigêrayîşê çareserîya sîyasîye û qewimîyayîşê herêmîyî ameyî nîqaşkerdene.

Temsîlkarê YNKyî Arêz Abdullahî mesajê YNKyî wend. Mesaj de ame vatene ke ganî masaya muzakereyan bêra awankerdene û seba çareserîye îradeyêko xurt bêro mojnayene.

Nameyê Îdareyê Xoserî ser o Bedran Çiyayî qisey kerd û ard ziwan ke vengdayîşê Rayber Apoyî seba pêro şarê kurdî destpêkê dewrêkê neweyî yo. Çiyayî pare kerd ke ganî destkewteyê Rojawanî bipawîyê.

Nameyê Têgêrayîşê Cinîyan ê Kurdan ser o Sultane Oger ard ziwan ke Vengdayîşê Haştîye û Komelê Demokratîkî yê Rayber Apoyî verê kurdan akerdo û ganî kurdî seba yewîye rêxistinîya xo bihêzêr bikerê.

Serekê Partîya Îslamî ya Kurdîstanî Hîkmet Serbilindî kongre de venga pêro partî û rêxistinanê kurdan da ke seba caardişê yewîye têbigêrê.

Delegeyanê Başûr, Rojawan û Rûsya yê KNKyî bi telekonferansî qisey kerd. 

Kongre siba do dewam bikera.