Serekê HEPî Vedat Aydin serrgêra 34ine ya qetilkerdişê xo de ame yadkerdene. Aydin 5ê temmuza 1991î de Amed de amebi destbendkerdene û cenazaya ey 7ê temmuze de qezaya Madenî ya Xarpêtî de amebi dîyene. Temsîlkarê partîyan û rêxistinan zî tede xeylê kesî beşdarê merasîmê yadkerdişî bîyî. 

Wekîla DEM Partî ya Amedî Ceylane Akça merasîm de qisey kerd û pare kerd ke netîceya têkoşînê Aydinî de ewro mehkemeyan de pawitişo bi kurdkî yeno kerdene. Ceylane vat: ‘’Cayo ke ey tede ame qetilkerdene nika bi hezaran vilî est ê. Bi hezaran Aydinî dadîya xo ra bîyî.’’

Dima girse ver bi gorê Aydinî Berê Mêrdînî şi û sloganê ‘’Şehid Namirin’’ vat.

Hemsereka DEM Partî ya Amedî gorê Aydinî ser de qisey kerd û vat: ‘’Aydin kesêko têkoşer bi. Ma rayîrê ey ser o şinê. Destê ey de çeke çin bîye. Ey seba ziwanê xo têkoşîn kerdêne. Ey keyeyê xo rê vatibi ‘Mi bi ziwanê xo îfade da, ê do mi qetil bikerê.’ O nêtersa. Rayîrê ey rayîrê ma yo.’’