Taxa Korxa ya qezaya Licê ya Amedî de seba ke xebata ocaxê kalkerî newe ra dest pêkerd Şikefteyo Birkeleynî yo tarîxî do zerar bivîno. Ocax 2021 de nêrazîbîyayîşê şarî ser o amebi qefilnayene. Warê ocaxî nêzdîyê keyeyanê taxanê Korxa û Hêdîkî yo zî. 

Roniştoxanê Hêdîkî ra Abdullah Kayayî ajansê Mezopotamya rê da zanayene ke rixmê muracatanê înan ê huqûqîyan zî ê nêeşkayî netîce bigêrê û vat: ‘’Ma Wezîrîya Kultur û Turîzmî rê muracat kerd û vat ke Şikefteyê Birkeleynî do zerar bivîno. Tena 500-600 kesî taxa ma de ciwîyenê û nê merdimî zî do ocaxî rê tesîr bibê. Mîrasê ma yo tarîxî ho yeno çinkerdene. Wa no ocax bêro qefilnayene.’’

Serekê Komîsyonê Huqûqê Şaristanî û Xoza yê Baroyê Amedî Ahmet Înanî zî îfade kerd ke roniştoxan gerreyê ocaxî kerdibi la derheqê gerreyî de dewlete çîyêk nêkerdo.

Înanî pare kerd ke ocax hem zerar dano daristanê taxan hem zî şikette coka ê do muracatê Mudirîya Daristanan û Mudirîya Pawitişanê Estbîyayîşanê Kulturî bikerê.

Înanî venga pêro kesan da ke wa seba qefilnayîşê ocaxî têbigêrê û şikefteyî bipawê.