Çarçaweya kampanyaya ''Ez wazena Abdullah Ocalanî zîyaret bikerî'' de 39 kesan ra heyetêk ame Tirkîye. Avûkato îtalyayij Fabio Marcelliyo ke heyetî de ca geno, ANFyî rê qisey kerd. Marcellîyo ke 33 serrî yo meseleya kurdan de eleqedar beno, vat semedê haştîyêka edîle çîyo muhîm oyo ke proses hetê şarî ra bêro wayîrvejîyayene.

Marcelliyî  bale ante muhîmîya fîkranê Abdullah Ocalanî ser û nê vatî: ''Ewro ma vînenê ke çîyê ke Rojhelatê Mîyanênî de qewimîyenê, bitaybetî zî kerdişê Îsraîlî yê vera Fîlîstînî qet hol nêşino.Na çarçewe de fîkrê komelê demokratîkî yê Ocalanî rayîrê xelisnayîşî mojneno. Nê hetî ra konfederalîzmo demokratîk têna Rojhelatê Mîynênî de ney, eşkeno xeylê welatan de bêro caardene. Çunke komelê kapîtalîstî de eke ti tewrbîyayîşê komelî bigîrê çimî ver, dengeyê hêzî eşkenê bêrê bedilnayene.''

Marcelliyî ard ziwan ke  seba ke Abdullah Ocalan bieşko rolê xo kay bikero, gerek tecrîd bêro wedaritene û o serbest bêro veradayene û vat: ''Ma zanê ke şarê kurdî sere de ziwanê dayîke wayîrê heqanê xo nîyo. Nê heqê qanûnî gerek zemînê qanûnî de bîgîrîyê binê temînatî. Eynî qeyde gerek proseso ke yeno rayraberdene o zî bîgîrîyo binê temînatî. Gerek hukmatê tirkî game bierzo.''

Marcelliyî bale ante muhîmîya wayîrvejîyayîşê prosesî ser û nê vatî: ''Zaf muhîm o ke şar wayîrê prosesî bivejo. Ê ke şer kenê, xora kenê la şarî ra qet çew şerî nêwazeno. Tirkîya de çareserkerdişê meseleya kurdan yeno manaya demokratîkbîyayîşê her kesî. Têna eke şar tewrê prosesî bibo demokratîkbîyayîş beno. Çîyo muhîm oyo ke mesele bibo komelkî.''