Hemsereka Pêroyî ya DEM Partî Tulaye Hatîmogullari heyetêkê partîye reyde CHP zîyaret kerd û dima Serekê CHPyî Ozgur Ozelî reyde eşkerayîyêka çapemenîye ya hempare daye.

Tulaye Hatîmogullari hêverî bale ante operasyonanê vera CHPyî ser û vat: ‘’Nê kerdişî vera îradeyê şarî darbe yê. Ganî merdimê ke ameyê destbendkerdene û tepiştene vera bidîyê. Hişmendîya qeyûman heyf ke dewam kena. Nê operasyonî operasyonê sîyasî yê.’’

Tulaye dima pare kerd ke ganî Meclîs de komîsyonêk bêro awankerdene, muhakemeyo xoser bikewo dewre û derheqê pêro şaredarîyan de tehqîqatî abibê. Tulaye vat: ‘’Bi nê hawayî do eşkera bibo ke nê operasyonî sîyasî yê. Ma pêşnîyaz kenê ke derheqê şaredarîyanê qeyûman de tehqîqatî abibê. Ma bivînê ke hela qeyûman se kerdo. Ma ewro qalê Haştîye û Komelê Demokratîkî kenê. La haştîye wina nêna. Welatî rê demokrasî lazim o. 

Nêzdî de komêka gerîlayan do çekan war verda. Çareserîya meseleya kurdan ha yena qiseykerdene. Nê atmosferî de operasyonê sey vera CHPyî prosesî rê zerar danê û coka ganî biqedê. Ganî ma haştîyêka raştikêne bîyarê ca. Haştîya winayêne zî bi beşdarîya pêro komelî mumkîn a. Bêrê ma pîya têbigêrê.’’

Ozgur Ozelî ard ziwan ke tewirê DEM Partî yê vera operasyonanê serê înan qîmetîn o. Ozgur Ozelî dîyar kerd ke mesleya kurdan bi vurîyayîşêkê demokrasîyî eşkena çareser biba û vat: ‘’Bê haştîye demokrasî yan zî bê demokrasî haştîye mumkîn nîyo. Nê wird pîya bibê welat do aram bibo.’’