DEM Partî Almanya, Îngîlîstan û Amerîka de falîyetê dîlplomatîkî rayra berdî. Mabênê tarîxanê 22-28ê hezîrane de heyetê DEM Partî Amerîka de tay temasî kerdî. Wekîla DEM Partî ya Amedî Ceylane Akça ke heyetê DEM Partî yê Amerîka de ca girewt, derheqê zîyaretê Amerîka de ajansê ma rê qisey kerd.

Qiseykerdişê Akça ra qismêk wina yo: ''Nizdê des serran verî hemserekê pêroyî yê dewrî Selahattîn Demîrtaş û heyetêkê ma bajarê Washington DCyî zîyaret kerdbi. Dima ra dîplomasîya bi Amerîka dahîna sînordar dewam kerd. Bado ke dezehanê fîkrî yê Amerîka waşt ma goştarî bikerî ma no zîyaret organîze kerd. Heyet de  tekîlîyanê teberî ra Ebru Gunay, îdareyanê herêmî ra  Mehmet Ruştu Tiryakî û mi ca girewt.

Ma cehd kenê ke vengdayîşê tarîxîyî yê  Birêz Ocalanî yê 27ê sibate bidê eşnawitene. Hetekî ra Almanya û Îngîlîstan de heyetê ma temasê xo rayraberdene hetê bînî ra ma zî Amerîka de pêvînayîşî kerdî. Bitaybetî derheqê Sûrîye de estbîyayîşê û tekîlîyanê Tirkşya û NATO de mesajê pozîtîfî yê Amerîka semedê ma muhîm ê.

Ma bi hetanê cîya cîyayan pêvînayîşî kerdî. Bi nê temasan mabênê sîyasetê 'rayîrê hîrêyînî' yo ke Amerîka de ame înşakerdene û xeta ma de têkîlîya muhîmî ameye ronayene. Kombîyayîşê masa gulyere yo ke hetê Middle East Institute (MEI) ra ame organîzekerdene, ma tewrê ci bîyî. Sersefîrê verên û neweyî, îdarekarê karanê teberî û akademîsyenî tewrê kombîyayîşî bîyîî. Derheqê prosesî de eleqe zaf bi. Tewr zaf persê sey qey Tirkîya gamanê pêtan nêerzena û do senî prosesî aver bêro ameyî persayene.

Ma senato û yewîyanê Wezîrîya Karanê Teberî yê  Amerîka de zî pêvînayîşî kerdî. Seba ke roja verêne ya pêvînayîşê ma de hêrişê Amerîka yê vera Îranî ame kerdene, tansîyon berz bi. Rîyê rojdemê zerî û krîzanê polîtîkaya teberî ra babetê prosesî zaf rojdemo verên nêbo zî, bado ke ma qisey kerd înan eleqe mojna ra û tay vîjnayoxan paştî daye ma.''