Serkêşîya Înîsîyatîfê Cinîyan ê ''Ez Hewceyê Haştîye ya'' de cinîyî Anqara de ameyî têhet. Cinîyê ke bi waştişê haştîye xeylê bajaran ra ameyî Anqara waşt Guvenparke ra ver bi meclîsî rayra şirê. Polîsan destur nêda cinîyî otobusan ra bêrê war û wesayaîtî ameyî berdene  berê Çankaya yê Meclîsî. Cinîyî tîyra bi rayraşîyayîşî şîyî Parka Meclîsî.Cinîyan tîya govende girewte û sloganî eştî û dima ra eşkerayîye daye.

Cinîyan vat: ''Ma ewro tîya verê berê meclîsî de hem veng danê şarî û hem zî veng danê meclîsî; Meclîs gerek cade seba zemînê huqûqî yê haştîye wezîfe  bîgiro xo ser. Gerek ma pêro pîya nê biwazê. Semedê haştîye wa hinî sîyaset sûc nêbo, tepişteyê sîyasîyî bibê azad, qeyûm û KHKyî peyser bêrê antene, operasyonê teberê sînorî bêrê vindarnayene. Semedê nê gerek cade bêro têgêrayane. Ma haştîyêka raşte, mendî û komelkî wazenê.''

Dima ra aktîvîsta TJA Gultane Kişanak qisey kerd. Kişanake nê vatî: ''Şima hetê şarî ra ameyî vîjnayene, ameyî meclîsî. Şima gerek meclîs de berpirsîyarîye bîgirê. Nê welatî de dejê tewr pîlî, dejê ke şerî afirnayî ê yê. No dejo ke zerrîya dayîkan veşneno, şima eşkenê peynîya ci bîyarî. Ma wazenê haştîya mendî înşa bikero. Ma wazenê  pirdê haştîya komelkî wa zerrî ra zerrî bêrê ronayene. Gerek cade polîtîkayê şerî rojdemê ma ra bêrê vetene û bi serûberkerdişanê qanûnîyan verê rayîrê haştîye bêro akerdene. Rojdemê ma cinîyan o verên haştîya birumete ya, ma do bi hewayêkê qerararî semedê nê têkoşîn bikerê.''