Seba Vengdayîşê Haştîye û Komelê Demokratîkî yê Rayber Apoyî bireso pêroyê komelî kombîyayîşê şarî yê DEM Partî û DBPyî dewam kenê. Hetkarê Hemserekanê DEM Partî yê Amedî Celal Alphanî derheqê babete de ajansê ma rê qisey kerd.

Alphanî da zanayene ke ê xîret kenê ke seba serkewtişê prosesî mesuldarîyanê xo bîyarê ca û vat: ‘’Birêz Ocalanî sey verî ancî seba caardişê haştîye û çareserîya meseleya kurdan xîret kerd. Ma nê prosesî ra û Birêz Ocalanî ra bawer kenê. Ma plan kerd ke bi hawayêkê hîrayî şarî rê qalê nê prosesî bikerê. Ma pêro qezayanê Amedî de karêko hîra kerd. 

Ma xo rê kerd armanc ke temamîya Amedî de xo biresnê 275 keyeyan. Beşêkê nê armancî ameyo cakerdene.  Heta peynîya temmuze ma do 250 keyeyan de kombîyayîş bikerê. Kombîyayîşê ma bi coşî dewam kenê. Eleqeyê şarî seba kombîyayîşanê ma zaf o. Şarê ma şarêko polîtîk o, her çî persenp. Ma vanê ke haştîya tewr xirabe şerê tewr giranî ra holêr o.

Mesuldarîya ma ya ke ma qalê prosesî bikerê û hayîya ma bi mesuldarîya ma est a. Hemwelatîyê ma yê ke tewrê kombîyayîşan benê wazenê ke dewlete gamanê zelalan bierza. Ma wazenê ke wayûbiratîye xurtêr bikerê. Şarê ma bi cidîyetî wayîrê prosesî vejîyeno.’’