Ewro verê Mehkemeya Herême ya Berze ya Celle de semedê Mehmet Çakasî çalakîye ameye kerdene. Çalakîye de seba aktîvîstê kurdî azadîye û heqê bextwaştişî ame waştene. Siba do verê Zîndanê Uelzenî ke Çakas tede yeno tepiştene, çalakîye bêro kerdene.
Semedê aktîvîstê kurdî Mehmet Çakasî ke Almanya wazenê tebersînor bikero çalakîyî bêmabên dewam kenê. Badê Hamburg û Hannoverî ewro verê Mehkemeya Herême ya Berze ya Celle de çalakîya protestoyî ameye kerdene.
Çalakîye de semedê pêro tepişteyanê sîyasîyan sloganî ameyî vatene. Dima ra derheqê dewaya Mehmet Çakasî de almankî û kurdkî zanayîş ame dayene. Temsîlkaranê KON-MEDî, komelê êzîdîyan û aktîvîstanê enternasyonalîstan waşt wa qerarê tebersînorkerdişî yê vera aktîvîstê kurdî cade bêro vindarnayene û heqê bextwaştişî bidîyo ey û pêro tepişteyanê sîyasîyan.
Çalakîye de semedê çalakîyanê bînan zî ame vengdayene. Goreyê nê siba do verê Zîndanê Uelzenî de yo ke Mehmet Çakas tede yeno tepiştene, saete 12:00 de mîtîng bêro kerdene. 12ê temmuze roja şemeyî de zî saete 14:00 Hannover de do mîtîng û rayraşîyayîş bêrê kerdene.
