Keyeyê Şenyaşarî 40 serrî yo qezaya Pirsûsî ya Riha de esnafîye kerdêne. 14ê hezîrana 2018î de keye pê fermanê Wekîlê AKPyî Halîl Îbrahîm Yildizî rastê qirkerdişî ame. Yildiz a roje seba karê weçînayîşî dekeweno dikana Şenyaşaran û vano waştişê înan esto yan çin o. Keyeyê Şenyaşarî zî vano 'Merdimê xo şîyar bikerê, roniştoxan ecîz kenê, qiseyan erzenê kêna û cinîyan.' Naye ser o Yildiz wexto ke dikane ra vejîyeno nîşan dano û merdimê ey hêrişê keyeyê İŞenyaşarî keno. Hêriş de Adil, Mûhammed, Mehmet, Ferît û Celal Şenyaşar birîndar benê û wedarîyenê nêweşxane. La merdimê Yildizî nêweşxane de zî hêrişê keyeyê Şenyaşarî kenê.

Babî Haci Esvet û dadîye Emîne Şenyaşar şinê Nêweşxaneyê Dewlete yê Pirsûsî. Merdimê Yildizî nêweşxane de pê kardan hêrişê Emîne û Esvet Şenyaşarî kenê. Babî Esvet Şenyaşar nêweşxane de yeno kiştene.

Babî Haci Esvet Şenyaşar û Celal Adil wina qetil benê. Fadil Şenyaşar zî 17ê hezîrane de pê sûcdarîya cînayetî tepişîyeno û erşawîyeno Zîndanê Xarpêtî. Fadil Şenyaşar hucreyê yewkesî de maneno.

Emîna Şenyaşar û lajê ci Ferît Şenyaşar 92 rojî yo verê Edlîyeya Riha de nobeta edaletî gênê. Keye wazeno wa Fadil Şenyaşar bêro veradayene û merdimê Yildizî bêrê tepiştene.

Emîne Şenyaşar ard ziwan ke a seba caardişê edaletî na çalakîye kena û da zanayene ke kamerayanê nêweşxaneyî ra dîmenî ameyî esteritene.

Emîne Şenyaşar eşkera kerd ke lajê ci Fadil 3 serrî yo zîndan de yo û vat: ''Înan keyeyê mi xera kerdo. Ez hînî nêeşkena keye de ronişa. Ma ameyî tîya ke nobeta edaletî bigêrê. Polîsî tîya de zî ma war nêverdenê, ma destbend kenê, danê tûtanê mi ro. La keyeyê Yildizî goreyê keyfê xo gêrenê. Kiştoxê tûtanê mi wa bêrê tepiştene. Pirsûs de ê verê çimanê ma de gêrenê, ez nêwazena înan bivîna.

Heta lajê mi Fadil bêro veradayene, kiştoxî bêrê tepiştene ez do çalakîya xo rê dewam bikera.Hînî weşîya mi zî hol nîya. Merdimê wayîrwijdanî yenê mi zîyaret kenê. Ma pê hêvîdar ê ke nê zîyaretî do dewam bikerê. Hewceyê ma bi hetkarîya her kesî esto.''