Hunermend Şivan Perwerî verê cû vîdeoyêk de vînayîş û rexneyê xo ardî ziwan la tay vateyê ey komelê êzidîyan de bîyî semedê nêrazîbîyayîşan. Şivan Perwerî derheqê babete de mesajêkê bi vîdeo erşawit û da zanayene ke nîyetê ey şaş ameyo famkerdene û uzrê xo waşt.

Mesajê Şivan Perwerî wina yo:

''Êzidîyî tarîxê kurdan ê. Ezidîyî wayûbirayê ma yê, çimê ma yê çunke înan zaf nêheqîye dîye. Dejê înan dejê ma yo. Ez qet nêeşkena ke seba neteweyêk, dînêk, komelêk vaja faşîst o yan zî rast o. Nîyet baş bi la uslubî ra vatiş baş nêame famkerdene. Ez qet nêvana êzidîyî faşîst ê, yan zî misilman, xiristîyanî faşîst ê. Eke ma qedr û qîmetê merdimanê xo bizanê ma qedr û qîmetê yewbînan zî zanenê. Naye ra xeylêk kesî pê vatişê mi qayîl nêbîyî. Ez rîca kena ke seba na mesele bi tolerans ma nêzdîyê yewbînan bibê. Eke mi zerrîya çewî dejnaya ez uzrê xo wazena. Ma êzidî yê, elewî yê, sûnî yê, xiristîyan ê, mazdeyî yê, yarsanî yê. Welatê ma tradîsyonêkê pîlî yo. Kurdîstanê ma wayîrê cenetê şahrezayî yo. Ma vanê ma birayê yewbînan ê, ma wayîrê yewbînan bivejîyê. Meseleya mi na ya, çîyêko bîn nîyo. ''