Avûkate û Endama OHDyî Sezîne Uçara ke weçînayîşê baroyî de namzete bîye û hetê Oda TVyî ra amebî hedef mojnayene derheqê şuxilnayîşê çekanê kîmyewîyan de ANFyî rê qisey kerd.

Sezîne Uçar da zanayene ke şuxilnayîşê çekanê kîmyewîyan peymana Cenevre ya Neteweyanê Yewbîyayeyan de amebi qedexekerdene û Tirkîya zî terefgîrêka na peyman a. Uçare vat: ''Tirkîya na peymane 1974 de qebul kerda. Goreyê na peymane şuxilnayîşê çekanê jehrînan û bîyolojîkan qedexe yo. Nika îdîayî est ê ke vanê Hêzanê Çekdaran ê Tirkîya nê çekî şuxilnayê. Dîmenî mojnenê ke nê çekî herêma Kurdîstanê Federalî de şuxilîyayê. Vera ney xeylêk dezgehî, selahîyetdarê partîyan û dewlete neçare mendî ke eşkerayîyan bidê. Çunke dîmenî benê sebebê şikî.

Nê îdîayî serebûtêko winasên o ke ganî qetî hetê heyetanê xoseran ra bêrê cigêrayene, doneyî bêrê arêdayene û şahidî bêrê goşdarîkerdene. Çunke nê çekî katogorîya sûcanê vera merdimîye de yê. Yanî na babete her kesî eleqedar kena. Çunke nê çekî zerar danê merdiman, xoza, awhewa û gandaran. Ganî nê îdîayî bêrê cigêrayene, belgeyî bêrê eşkerakerdene û raporî bêrê amadekerdene. Eke nê îdîa û dîmenî bêrê sereraştkerdene kesê ke nê çekî şuxilnayê qetî ganî bêrê cezakerdene.''