Bi şahîdîya Kezîbane Kuday 13 kesê ke çewaya cipersayîşê Serdozgerîya Komare ya Amedî de Amed, Mêrdîn û Riha de ameybî destbendkerdene ra 10 kesî ameyî tepiştene.

Kesê ke ameybî destbendkerdene vizêr vejîyayî mehkeme. Mehkeme de endamê Merkezê Partîye yê HDPyî Halîde Turkoglu, Çekdar  Budak, Sevîme Akdag û Zelîha Kocaman û endamê Meclîsê Ciwanîye yê HDPyî Betule Unsal, Metîn Yilmaz, Bêrîtane Yaşar, Hamza Agirman, Esengule Kiliç, û Mustafa Kurt bi îdîaya ''endamîya rêxistine'' ameyî tepiştene. Nurullah Ozgun û Rûbar Armagan bi şertê kontrolê edlîyî û Emîne Aksoy zî badê îfadeyê dozgerîye ameyî veradayene.

Hetê bînî Anqara de endamanê Înîsîyatîfê Wendekaranê Azadan taxa Tucluçayirî de bi rayraşîyayîşêkî tepiştişê endamanê Meclîsê Ciwanîye yê HDPyî şermezar kerd. Ciwanan vat ê do çirey vera polîtîkaya zext, tehdît, remnayîş, destbendkerdiş û tepiştişî de çok medê û rixmê heme hêrşan têkoşînî rê dewam bikerê.