Namzeda hemşaredarî ya Qersî ya  DEM Partî Arzu Savaş Derman ANFyî rê qisey kerd.

Arzu Savaş Derman ard ziwan ke şarê Qersî zaf eleqe mojneno înan û vat: ''Ma Qers de qerardar ê. DEM Partî têgêrayîşêkê şarî yo. Kam ke qala heq û hûqûqî, rindîye û holîye keno, ma cayê xo de qebul kenê. Ma do heme şarê Qersî rê secîye xizmet bikerê; haştîye û hûzûrî înşa bikerê. Ma do Qers de keye-keye, kuçe - kuçe bigêrê şarî ra paştî bigerê û her kesî rê secîye xizmet bikerê. Ma do semedê kede, azadîye û paştîdayîşê cinîyan projeyanê xoseran bikerê.

Îqtîdarî qet qiymetê bajarê tarîxî nêzana. Bajarê Qersî pakkerdişî ra mehrum ameyo verdayene. Bajar bi heywankarîye û bazirganîya sînorî wayîrê fonksîyinê pîlî yo la yeno îhmalkerdene. Şarê Qersî do wextê îdareyê ma de xîzmeto ke heq keno bîvîno. Ma sey partîye wayîrê paştdayîşê pîlî yê şarê fedakarî yê. No şar heqdar o ma do pîya ser bikewê.''