Komîteya Vergirewtişê Îşkencetî ya Konseyab Ewropa (CPT) wextêkê dergî ra dima Îmrali zîyaret kerdbi la derheqê çimdarîyanê xo de eşkerayîyêke nêdaye. CPTyî pare kerd ke ê do mîyanê 6 mengan de raporê xo amade bikerê la nêeşkenê bê destûrê Tirkîya raporî eşkera bikerê.

Avûkatanê Rayberê Şarê Kurdî Abdullah Ocalanî ra Cengîz Yureklîyî derheqê nê zîyaretî û prosedurî de ANFyî rê qisey kerd.

Yureklîyî vist vîrî ke CPTyî nê zîyaretî ra ver 2019 de rayêk Îmrali zîyaret kerdbî û vat: ''Ma nêeşkenê muwekîlê xo ra xebere bigêrê. Ma na rewşe resnabî CPTyî û rayaumûmîye zî tedaya înan kerde. Axir CPTyî bi lezî no zîyaret kerd. Cayo ke CPT şino ci tede bi îxtîmalê pîlî îşkence est o, kerdişê xirabî est ê. Nêno qebulkerdene ke CPT nê warî de eşkerayîye nêdano. 24 serrî yo tecrîdê Îmraliyî dewam keno, ganî CPTyî hînî înîsîyatîf bigirewtêne. A raşte CPT wayîrê ê înîsîyatîfî yo ke eke dewletêke pêşnîyazanê ci nêana ca raporê xo eşkera bikero. CPT eşkeno rayaumûmîye rê eşkera bikero ke rewşa Birêz Ocalanî senîn a, Îmrali de çi qewimîyeno.

CPT seba xêra çewî nêşîyo Îmrali. Cara erkê ci no yo. Ganî rew ra no zîyaret bikerdêne û agahîyî vila bikerdêne. Sere de CPT pêro dezgehê Ewropa mesuldarê nê tecrîdî yê. Heta ke pêvînayîşê Ocalanî yê bi keye û avûkatan bêrê kerdene CPT û dezgehê bînî mesuldar ê ke têbigêrê û çareserîye awan bikerê.CPT ganî raporê xo yê serê Îmraliyî 6 mengan de amade bikero, pêşkêşê rayanê endam û îdarekaranê xo bikero û dima bişawo hukmatî. Eke hukmat biwazo zî rapor eşkera keno. Heta ke no proses nêqedo ma nêeşkenê rewşa Îmraliyî bizanê. Sîstemê CPTyî wina yo, seba ke dewletî teng nêbê bi na polîtîka pasîfîze bîyo.''

Yureklîyî bale ante kombîyayîşê Komîteya Wezîran ê 20ê êlule ser û vat: ''Nê kombîyayîşî de bire dîyaye ke seba ke Tirkîya derheqê binpaykerdişanê heqan de cewabê xo bida heta êlule wext bêro dayene ci. Bi nê hawayî seba fikirîyayîş û bahaneyan viraştişî wext dîya Tirkîya. CPTyî mîyanê 24 serran de derheqê rejîmê Îmraliyî de tim waşt ke hêvî bido û nêrazîbîyayîşan bikêmîno. Wexto ke nê keno zî paştî dano polîtîkaya hukmatî. CPT pabesteyê Konseya Ewropa ya. Konseya Ewropa û dezgehê bînî zî a raşte nêwazenê na mesele çareser biba, têna xo wina mojnenê ke bilîyê mesele benê.

Heta ke meseleya kurdan a ke hînî meseleyêka global a, nêra çareserkerdene meseleyê bînî zî sey xo bimanê. Birêz Ocalanî çend reyî vatbi ke eke firsend bêro dayene o eşkeno na mesele bi rayîrê demokrasî çareser bikero. La nika ma nêeşkenê tira xeberêke zî bigêrê. Eke merdimî na bêhuqûqîya vera Ocalanî nêvînê hînî krîzî xora do bikewê bara înan. Ganî pêro merdimî seba awankerdişê komelêkê azad û demokratîkî vera tecrîdê Îmraliyî vengê xo berz bikerê.''