Avûkatanê Abdullah Ocalanî ra NYyî rê muracato lazebez

Avûkatanê Buroyê Hukukî yê Asrini muracatê komîteya vera îşkenceyî yê Neteweyanê Yewbîyayeyen kerd ke wa lazebez vera binpaykerdişanê heqan ê ke Îmralî de qewimîyenê têbigêro.

Goreyê xebera Ajansê Mezopotamya avûkatanê Buroyê Hukukî yê Asrini seba ke heqê pêvînayîşî yê Rayberê Şarê Kurdî Abdullah Ocalan û tepişteyanê bînan ê Îmraliyî Omer Hayrî Konar, Hamîlî Yildirim û Veysî Aktaşî yeno binpaykerdene, muracatê komîteya vera îşkenceyî yê  Neteweyanê Yewbîyayeyen (NY) kerd ke wa lezabez vera na neheqîye têbigêro.

Muracat de bale ameye antene madayenê vera îşkenceyî yê Pêkerdişê Heqanê Medenî û Sîyasîyî yê Mîyanneteweyî ser û ame vatene ke nê madeyî Îmrali de yenê binpaykerdene. Muracat de wina ame vatene: ''Muwekîlê ma sey bêwext hucereyan de yenê tepiştene,destûr nêdîyeno qet îrtîbatê înan teberî de bibo û pêvînayîşê merdiman û avûkatanê înan ameyî qedexekerdene. Rewşa muwekîlanê ma ganî sey hepsê 'incommunicado / destsernayîş' bêro ercnayene. Na rewşe goreyê belge û standartanê heqamê merdiman ê mîyanneteweyî nîya. Qeraranê Konseya Heqanê Merdiman a NYyî de  'incommunicado' sey teberê merdimîye ameyo ercnayene.''

Avûkatan  qerarê Mehkemeya Heqanê Merdiman ê Ewropa (MHME) yê derheqê Abdullah Ocalanî vist vîrî ke binpaykerdişê heqanê Îmraliyî sey îşkende name kerdbi. Avûkat ard ziwan ke ê 25ê adara 2021î ra nata muwekîlanê xo ra xebere nêgenê û vat: ''Badê qerarê MHME tecrîd giranêr bi. Na rewşe zaf birîsk a. Ma nêzanê ke muwekîlê ma şertanê senîn de yê, coka ma zaf qesawet kenê. Seba ke caardişê 'İncommunicado' yê vera Birêz Ocalan û muwekîlanê ma yê bînan cade bêro qedînayene, ma wazenê ke şima cade têbigerê û semedê tespîtkerdişê asayîşê muwekîlanê ma Îmraliyî zîyaret bikerê û gamê ke hewce kenê bierzê.''