Îdarekaranê Federasyonê Komeleyanê Paştdayîşê Huqûqî yê bi Keyeyanê Tepişte û Hukwerdeyan (TUHAD-FED) ra avûkate Aslihane Bulut derheqê binpaykerdişê heqanê tepişteyan de ANFyî rê qisey kerd. 

Bulute vist vîrî ke bi vurnayîşê Îdarenameyê Krîteranê Çimdarîye rewşa tepişteyan 3 mengan yan zî 6 mengan de rayêke yena ercnayene û bire yena dîyene le bêrê veradayene yan nê. Bulute îfade kerd ke tepişteyan rê persê sey 'Ti PKK sey rêxistinêka terorî vînenî yan nê?', 'Ti Abdullah Ocalanî ser o çi fikirîyenî?' yenê kerdene. 

Bulute vat: ''Nê persî huqûqî nîyê. Grevê vêşanîye yê bi 20 rojan ra dima no îdarename vurîya. Nê îdarenameyî ra semed xeylêk tepişteyê ke 30 serrî tepişte mendî û cezaya înan qedîyaye, hema zî tepişte yê. Mergê tepişteyan seba ma mergê şikdarî yê. Mîsal, sey Mehmet Sevînçî hucreyê yewkesî de verdayîşê tepişteyanê nêweşan nêno qebulkerdene. Tepişteyanê nêweşan rê bi nê hawayî merg yeno ferzkerdene. Rixmo ke hukmê tepişteyan ameyî tesdîqkerdene zî bi bahaneya 'asayîşî' odaya yewkesî de verdîyenê. No hem tecrid o hem zî yeno manaya çinkerdişê fîzîkîyî. Heman wextî de tepişteyan rê bi nê hawayî xokiştiş yeno ferzkerdene. 

Keyeyê tepişteyî wazenê ke tepişteyanê îşkencekerdeyan de pêvînayîş bêro kerdene û hetê huqûqî û dîplomatîkî ra xîretî wa bêrê kerdene. Ganî ma bibê vengê tepişteyan. Bi taybetî ma wazenê muracatê dezgehanê mîyanneteweyîyan bikerê. Ganî çareserîyêka lezabeze bêra peydakerdene. Ganî tepişteyê ke cezaya înan qedîyaya vera bidîyê. Keyeyî wazenê na polîtîka wa bêra teşhîrkerdene. Xora cezayê dîsîplîn û hucreyî zî eleqeyê înan bi tecrîdî est o.''