Çarçewa tehqîqatanê cîyayan ê Serdozgerîya Komare ya Îstanbul û Tekîrdagî de 3ê hezîrane de, polîsan eştbi Komeleya Teqîbkerdişê Goçî (GOÇÎZ-DER) ser û hemserek, endam û îdarekê komele, endamê HDP û HDKyî zî tede 58 kesî destbend kerdî.

Avûkatê GOÇÎZ-DERî Ahmet Baran Çelîkî derheqê operasyonê vera komeleya înan de ANFyî rê qisey kerd.

Çelîkî vist vîrî ke operasyon de 22 xebatkarê înan ameyî destbendkerdene û derheqê 28 kesan de bira destbendkerdişî dîyaye. Çelîkî eşkera kerd ke 22 kesî hema zî nezaret de yê û îfadeyê înan nêgêrîyayî. Çelîkî vat: ''Dosya ser o bira nimite est a, coka ma nêeşkenê cigêrayîşî bikera. Agahîyê ke destê ma de yê, ma ê medyaya terefgîra îqtîdarî ra girewtê. Goreyê nê xeberan komele ser o cigêrayîşê fînansî est o, komele pere şawito keyeyanê endamanê rexistine. Komeleya ma çarçewa xebatanê xo de çend kitabî çap kerdbî. Nê kitabî zî ameyî qedexekerdene. Nê zî mojneno ke armancê înan o sereke astengkerdişê xebatanê komele yo. Ê wazenê çimê ma bitersnê.''

Avûkat Çelîkî ard ziwan ke GOÇÎZ-DERî wextê peyênî de koçberanê afgan û sûrîyeyîjan ser o zî xebatî kerdêne û seba ke nîjadperestîye zêdîyaye komeleya înan zî bîya hedef. Çelîkî vat: ''Hêrişanê vera koçberan de desteko huqûqî dîyeno. Nîjadperestîya vera nê koçberan zêdîyena û bi nê hawayî zî komeleya ma bena hedef.''