Wekîlê HDPyî yê Çewlîgî Erdal Aydemîrî da zanayene ke banê ke erdlerzê Kanîreşî yê 2020î ra dima virazîyabî, zixm nîyê.

Aydemîrî bi vernîyazêkê persan babete berde rojdemê Meclîsî. Aydemîrî Meclîs de derheqê babete de qisey kerd û pare kerd ke erdlerzî ra dima sozê ke dîyabî şarî, nêameyî caardene û vat: ''Soz ame dayene ke bîna û axûrê ke vera erdlerzî zixm ê, do bivirazîyê. Dewê ke erdlerz de zerar resabi înan, pê heywankarîye debara xo kenê. Dewijan mi rê pare kerd ke bîna û axûrê ke dewlete viraştê zimistan de rijîyayê û fîrmaya viraştişî kontrol de bêusûlîye kerda.''

Aydemîrî vernîyaz de nê çîyî pers kerdî:

-Sozê ke dîyabî mexdûranê erdlerzî ameyî caardene?

-Rixmo ke di serrî vîyartî hema zî tay ban û axûrî nêvirazîyayî. Sebebê ney çita yo û nê banî do bêrê viraştene?

-Kamyew ekîpî şîyê kontrolî û raporê înan kamyew aste de yê?

-Şima do sebebê rijîyayîşê bînayan rayaumûmîye de pare bikerê?