Dezgehê Tipê Edlîyî seba sîyasetmedara kurde Aysele Tugluka ke nêweşa demansî ya û Zîndanê Kandira de tepişîyayêne, raporê 'nêeşkena zîndan de bimana' da. Badê qerarî Tugluke ameye tehlîykerdene.

Merdim û avûkatê Aysele Tugluk û xeylêk kesî vizêrna verê zîndanî de pawenê.Tugluke hetê avûkatanê OHDyî, wekîlanê HDPyî Zuleyha Gulum, Serpil Kemalbay, wekîla verêne Burcu Çelîk, îdareyê partî yê Gebze, îdarekarê MA-TUHAYDER û xeylêk kesanî ra pê çapik, tîlîlî, slogana ''Jin, Jiyan, Azadî'' û vilikan ameye verwazîkerdene.

Tugluke seba ke rîyê nêweşîya xo ra nêeşkaye qisey  bikero wesayîtî ra çapemenî selam kerd.  Herinda Tugluke de wekîlanê HDPyî Zuleyha Gulum û Serpil Kemalbay  eşkerayîye daye.

Gulum pê selamanê Tugluke dest pê qiseykerdişî kerd. Guleme vat: ''Ma pê keyfweş ê ke embaza ma Aysele ameye veradayene û hinda eşkena tedawî bibo. Aye zî vat semedê embazanê xo yê ke zîndan de mendê qehrîyena. Aysele xeylêk wexto nêweş a û ganî rewna biameyêne veradayene.''

Gulume waşt wa heme tepişteyê nêweşî bêrê veradayene û semedê tepiştişê Sereka TTByî Sebneme Korur Fîncan di hêrsê xo ard ziwan.

Serpile Kemalbay zî vist vîrî  ke Aysele Tugluk sey yew cinîya kurd û sîyasetmedare rixmê nêweşîya demansî di serrî yo zîndan de ya û vat: ''Qerarê peydeeştişê înfazî zaf ere ame dayene.'' Kemalbay ard ziwan ke ganî heme tepişteyê nêweşî semedê tedawîkerdişî bêrê veradayene û qalkerdişê xo pê vatişê Jin jiyan azadîye qedîna.

Tugluke dima ra semedê tedawî ameye berdene Îstanbul.