Endama Konseya Rayberdişî ya KJKyî Çîgdeme Dogu û Endama Meclîsê PAJKî Tekoşîne Ozan programêkê taybetî yê Medya Haber TVyî de vengdayîşê Rayber Apoyî yê 27ê sibate û 8ê Adare Roja Cinîyan ê Kedkaran a Dinya erjnayî.

Çîgdeme Dogu vengdayîşê Rayber Apoyî sey manîfestoyî name kerd û nê vatî: ''No vengdayîş semedê ma wezîfeyêk o.Ma wina genê dest. Gerek Rayber Apo bieşko şertanê azadan de bixebito. Azadîya Rayber Apoyî averşîyayîşê prosesî garantî kena. Gerek têkîlîya Rayber Apoyî bi her kesî bibo ke bieşko prosesî rayra bêro. Gerek bieşko hemrayanê xo reyde, ma de têkîlî rono. Rojdemê kongreyêke est o. Gerek îmkanê ci yê resnayîşî bibê ke bieşko heme hetan de qisey bikero.

Hetê bînî ra gerek Hemleya Azadîye bêro domnayene. Ma heme hêzê xo seferber bikerê ke bi azadîya Rayberîye projeyê komelê demokratîkî bêro caardene.''

Çigdeme Dogu ard ziwan ke 8ê Adare têna roja protestokerdişî ya zî pîrozkerdişî nîya û nê vatî: ''Gerek wina nêro vînayene ke ma 8ê Adare de bêrê têhet protesto bikero û bibê vila. Protesto xora gerek bêro kerdene la gerek têkoşîn bêro xurtkerdene û averberdene.  Cinîyî komel bi xo yê. Coka azadîya cinîyan azadîya komelî ya. Coka eke ma vanê 'Komelo Demokratîk' na azadîya cinîyan a. Rolê cinîyan tîya de gird o.''

Endama Meclîsê PAJKî Tekoşîne Ozan zî nê vatî: ''Bi bedalanê girdan ma heta na nuqtaya tarîxî ameyî. Her cumeleya Rayber Apoyî sey manîfestoyêk a. Mesajê xo de xora eşekara vano, prosesê verê ma de  gerek çi bêro kerdene. Rayberîye xora wexto ke Paradîgmaya Modernîteya Demokratîke aver berde nameyê ci nabi pa. No vengdayîş têna vengdayîşê demê sîyasîyî nîyo. Eynî wextî de manîfestoyê tewirê sîyasî-polîtîkî yê seserra 21ine, terzê têkîlîya komelkî, tewirê cuye, tewirê cuyeya kolmelkî yo ke cinîyî zî serkêşîya ci kenê.

Hetê bînî ra 8ê Adare Roja Cinîyan ê Kedkaran a Dinya nizdî bena. Cinîyan emser rewî ra dest pê hazirîye kerd. Her cayê Kurdîstanî de goreyê şertanê xo startê çalakîyan ame dayene. Gerek azadkerdişê cinîyan ra nêro tersayene. Rayberîye vat 'cinîya ke bena azad sey tîje kena a.'  Gama ke cinîyî benê azad, benê wesîleya xelisîyayîşê camêrdan zî. PKK têna têkoşîno çekdar nîyo; eynî wextî mîyanê xo de tradîsyonêk afirna ke camêrdîya xo perseno. No tecrubeyêko zaf muhîm o.''