Hemserekê Pêroyî yê DEM Partî Tuncer Bakirhanî kombîyayîşê kome yê meclîsî de rojdem erjna.

Bakirhanî bale ante munaqeşeyanê ''prosesê neweyî'' yê derheqê meseleya kurdan ser û nê vatî: ''Ma bertengê destpêkerdişêkê neweyî de yê ke do qederê şaranê Tirkîya û Rojhelatê Mîyanênî bibedilno. Ma nuqtayêka bedilyayîşî de yê ke do tesîrê ma perûne bikero. Çimê her kesî vengdayîşê Birêz Ocalanî de yo. Her hetê dinya ra ma rê mesajî yenê, persî yenê. Meraq û heyecano gird est o. Bi mîlyonan kesî dûa kenê ke wa narey çareserî bibo. No şar haştîye wazeno, azadîye wazeno.

Heyetê ma Îdareyê Herêma Kurdîstanî zîyaret kerd, pêvînayîşê muhîmî kerdî. Heta bînî ra Hemsereka ma Tulaye Hatimogullari bi heyetêkî Ewropa de falîyetê dîplomasî rayra berdî. Hewlêrî ra heta Amedî, Mêrdînî ra heta Kobanê, Kirmanşahî heme kurdî vanê ma haştîye rê hazir ê. Her hetê Tirkîya de şar haştîye wazeno. Her hetê dinya de şar paştî dano çareserî. Pekî îqîtdarî semedê haştîye hazir o? Eke îqtîdar zî hazir o ma eşkenê ameyoxê demokratîkî yê şaran înşa bikerê.''

Bakirhanî badê kombîyayîşî cewab da persanê rojnamegeran.Vatişê ''Ganî eşkerayîya Rayber Apoyî bidîmen bo'' yê Hemsereka Pêroyî ya Konseya Rayberdişî ya KCKyî Besê Hozat,  Bakirhanî ra ame persayene. Bakirhanî vat: ''Qendîlî eşkerayîya xo daya. Ma zî seba ke dahîna zaf tira bawerî bibo wazenê ke wa eşkerayîye bidîmen bo. Îqtîdar do pîya bi Birêz Ocalan qerar bigîro.''