Belçîka de Konseya Dewa yê Xerîban a ke vera qeraranê şexsîyan ê vera xerîban têgêrena vat: ''PKK rêxistina terorî nîya.''

Konseya Dewa ya Xerîban a ke îtîrazê vera redkerdişê îltîca yê kurdêkî ercna vat PKK rêxistina terorî nîya la berpirsîyarîya şexsîye ya sûcê şerî werte ra wenêdareno. Konsey qerarê rîyê PKKyî ra betalkerdişê îltîcaya kurdê multecîyî betal kerd. Qerar de ame vatene ke ê PKKyî sey rêxistina terorî dest nêgenê.

Konseya Dewa vat ê qerarê Mehkemeya Temyîzî ya Brukselî raşt vînenê. Mehkeya Temyîzî  20ê çeleyê 2020î de qerarê Mehmekeya Îstînafî yê 8ê adara 2019î qebul kerdbi. Edaletê Belçîka vatbi PKK rêxistina terorîste nîya û coka hetê qanûnanê mîyanneteweyî ra nêeşkena bêro muhakemekerdene.

Qerar de derheqê multeciyê kurdî de zanayîş nêame dayene. Avûkate Selma Benkhelîfa vat no qerar derheqê multecîyê kurdê sîyasîyî yo ke îltîcaya ci ameye redkerdene de ame girewtene. Benkhelîfa ard ziwan ke hukmat û Komeserîya Pêroyî yê Belçîka  goreyê qerarê mehkeme tênêgêrnê û vat bêhurmetîya vera qerarê mehkeme problem o.