Vera tecrîdê Îmraliyî KCD, TJA, DBP û HDPyî waşt ke şorê dewa Amara ya Xalfetî ya ke Rayberê Şarê Kurdî Abdullah Ocalan tede bibi. Xeylêk şaristanan ra şar ame û verê kontrolî yê dekewtişê dewe de ame vindarnayene. Leşkeranê tirkan nêverda ke şar şoro Amara.

Şaro ke zafê ci Pirsûs û Çewlîgî ra amebi, hetê birayê Abdullah Ocalanî Mehmet Ocalanî ra, birarzayê Ocalanî û Wekîlê HDPyî Omer Ocalan û Alî Ocalanî ra ame pêşwazîkerdene.

Wekîlê HDPyî yê Riha Omer Ocalanî pare kerd ke zîyaretê keyeyî yeno astengkerdene û vat: ''Abdullah Ocalan muxatabê çareserîya meseleya kurdan o. Dewa ma Amara 4ê nîsane de zî gêrîyabî binê abluqa. Dewlete wina şarî rê heqaret kena. Berê ma her kesî rê akerde yo, no keye keyeyê şarê kurdî yo.''

Dima Mehmet Ocalanî qisey kerd û îfade kerd ke tecrîdkerdişê Ocalanî hetê pêro dinya ra zanîyeno. Ocalanî vat: ''Di serrî yo xebera ma pê Îmraliyî çin a. No qanûnanê Tirkîya de zî qanûnanê dinya de zî çin o. Ma nê tecrîdî qebul nêkenê. Ganî berê Îmraliyî bêrê akerdene. Nê kerdişê antîdemokratîkî çare nîyê. Ganî pêro meseleyî bi hawayêkê demokratîkî bêrê çareserkerdene. Ney ra ber çareyêka ma çin a.''